549/2025-2026

Bilkhawthlir Dated the 10th May, 2025 : Vawiin chawhnu dar 2:00 khan Bilkhawthlir Primary Health Centre(PHC) chuan National Quality Assurance Standard (HQAS) in Sawrkar Damdawi In ti thate tana a pek thin NQAS National Certification a dawn lawmna Bilkhawthlir PHC Conference Hall-ah neih a ni a. He hun hi Pi J. Lalmuanawmi, Nursing Officer kaihhruaina hnuaiah neih a ni a. Dr. RK Lalthlamuana, Sr. Chief Medical Officer, Kolasib District chu he hunah hian khuallian niin Pu Samuel Lalmalsawma Sailo, BDO Bilkhawthlir chu khualzahawm niin hun a hmanpui bawk a ni.

Khuallian Dr.RK Lalthlamuana CMO Kolasib chuan Bilkhawthlir chu a post hmasa ber a nih thu sawiin, chutihlai chuan dawhkan mumal pawh a awm lova, tunah erawh chuan nasa takin hma a sawn chho a, Mizoram mai pawh nilo, NQAS National Certified hial an ni thei ta chu lawmawm a tih thu sawiin, thawktute leh khawtlang tanrualna vang liau liau a ni a ti. Kolasib district ah PHC 5 an awm mek tih sawiin national level certified turin 70 hmuh kai a ngaih laiin Bilkhawthlir PHC in 90 chuang zet an hmu chu lawmawm a tih thu a sawi bawk. Tunah hetiang dinhmun kan thleng chho tawh a, hma sawn chho lehzel turin hmabak kan la nei tih hriaa tan kan lak chhoh zel a pawimawh thu a sawi bawk.

Pu Samuel Lalmalsawma Sailo Khualzahawm chuan Bilkhawthlir PHC in NQAS National certification an nei thei chu lawmawm a tih thu sawiin, thawktute inpekna ropui a tih thu a sawi bawk. BDO chuan mizote mizia thalo tak pakhat tih mai mai duhna hi paih bo ila, tih tak takna nen bei thin ila a tawpah chuan hlawhtlinna kan chang nge nge thin tih a sawiin, Damdawi in hmasawn zelna tur hian thawktute mai bakah khawtlang mipuite hian mawhphurhna kan nei a ni a ti bawk.

Dr.Lalchhanhima Hmar MO Bilkhawthlir PHC chuan technical report pein, NQAS hian a tum ber chu sawrkar damdawi inah damloten enkawlna tha leh dik thei ang ber hman hi a ni a ti a. Damloten enkawlna dik leh tha thei ang ber an dawn a, fai mai bakah thianghlimna tel, mipuite tana rintlak leh rin ngam damdawi in kan neih theihna tura ruahman a ni a, India ram puma sawrkar damdawi in te tan thil tha zawk leh hmasawnna tura duan a ni a ti bawk.

Damdawi In pantu damlote’n enkawlna dik leh tha thei ang ber an dawn a, faina mai bakah thianghlimna tel, mipuite tana rintlak leh rinngam Damdawi In neih a nih theihna tur leh a Quality-te chhunzawm zel tura India ram Sawrkar Laipui-in hriselna lam ngaihtuahtu tura a din - NHSRC (National Health Systems Resource Centre) ten tehfung an duan hmangin India ram pumah endikna hna kalpui thin a ni a. Hei hi intihsiakna ni lovin, India ram pumpuia Sawrkar damdawiin te a tana thil tha zawk leh hmasawnna tur a duan leh tehfung a siam a ni.

He NHSRC endikna kal zelah Bilkhawthlir Primary Health Centre chuan Ni 28-29 March 2025 khan National Level NQAS Assessment a hmachhawn a. He tah hian National Assessor challang tak tak Dr. Asish Kumar Gosh leh Dr. Isha Sachdeva te’n endikna neiin, National Assessor-te hi an lungawi hle a. He Assessment Result hi Ni 11 April 2025 khan tih chhuah niin Result atang hian Bilkhawthlir PHC chuan Kolasib District chhunga National Quality Certified hmasa ber ni turin 94.95% a Score a. Hei hi Mizoram chhunga PHC Level-ah chuan Score sang ber Record a la ni rih. Tun dinhmunah Mizoram chhungah NQAS National Certification nei hi damdawi in 16 a awm mek a, PHC 9, District Hospital 5, UPHC 2 te an ni.

NQAS in a tum ber chu Sawrkar Damdawi Inah damlote’n enkawlna tha leh dik (Quality) thei ang ber neih hi a ni. Chumi endikna (Checklist) ah chuan Ngaihtuah bik (Area of Concern) 8 a awm. NQAS (National Quality Assurance Standard) endikna tur hian District Hospital/Sub-District Hospital/CHC/PHC/HWC/SC ah te checklist awm a ni.