No.4141/2021-2022
Aizawl dated 1st March 2022: Ni thum awh tur ‘Capacity Building on Women in Politics’ chu Extension Training Centre, SIRD & PR, Kolasib leh National Commission for Women, New Delhi tangkawpin Bilkhawthlir RD Block Village Council hrang hranga hmeichhe member-te tan buatsaih a ni a. Dr.H.Lalthlangliana, Deputy Commissioner chuan vawiin chawhma khan Training hawnna hun a hmanpui.

Deputy Commissioner, Kolasib chuan khawtlang inrelbawlna a hmeichhia tel tur a ruahmanna chu State thenkhatah an kalpui theih loh laiin Mizoram chu a tak a kalpui hmasa pawl a nih thu a sawi a, hei hian kawng hrang hranga mipa leh hmeichhiate dinhmun a lo intluktlan sa tawh vang a nih thu a tarlang bawk a ni. Khawtlang aiawha rorel tur a thlan chhuah hmeichhiate chu an thiamna leh theihna tipung a, hmasawn tum a bei turin a chah a, tunlai khawvel changkanna ina a ken tel Social media kaltlanga thu belhchian dawl lo leng vel a innghat mai lovin, mithiamte leh lehkhabute rawn tam thin turin a fuih bawk a ni.

Vawiin Training hawnna hun hi Pu Z.R.Thafala, Principal, Extension Training Centre-in a kaihruai a, Pu Hmingthanzuala, DIPRO-in a telpuiin Bilkhwthlir RD Block hnuai a hmeichhe VC Member 42 an tel bawk a ni.

‘Capacity Building on Women in Politics’ ah hian ‘She is a Changemaker’ tih thupui a hman a ni a. Vawiin ah hian ‘Women Reservation in Politics’, ‘Cyber Crime and Human Trafficking’, ‘Law relating to Protection of Women’ leh ‘Effective Communication Skills’ tih thupui ahte zirtirna neih a ni a. Khawtlang inrelbawlna kawng a hman tangkai theih tur thupui hrang hrang mithiamten zirtirna an pe dawn bawk a ni.