Institute of Applied Systems & Rural Development(IASRD) leh Rotary Club of Aizawl buatsaihin vawiin khan Bio-Fuel leh Green Energy pawimawhna chungchang sawihona, “Seminar on Promotion of Bio-Fuel & Green Energy for Sustainable Growth and Its Impact on Climatic Change” chu I&PR Auditorium ah neih a ni.
He seminar-a Khuallian, Pu Lalkhama IAS(Rtd), State Planning Board Vice Chairman chuan mihringte chenna leilung hi tihpalh thila lo awm ni lovin awmze nei taka duan a ni a. Leilung hausakna te pawh mihring te mamawh phuhru turin daih chin nei tura duan an ni, a ti a. Mihring khawsakna lo sang zel hian energy mamawhna a tihpun rualin leilung hausakna, tuialhthei leh lungalhthei te nasa taka hai chhuak a, uar taka kan hman hian kan chenna khawvel leh boruak ah nghawng tha lo tak a nei mek a. Leilung leh boruak hi a bawlhlawhin a sa telh telh a, mithiam te chhut dan chuan tun kum zabi chanve a liam meuh chuan leilung boruak hi 5oC laiin a lum belh dawn a ni, a ti a. Bio-fuel leh green energy siam chhuah leh hman tangkai dan kan thiam loh chuan mihring te hi kan chenna khawvel chhiatna thlentu ah kan tang mek a ni, a ti a. Thangthar ten an hma lam hun ngaihtuah chungin he harsatna sutkian na tur hi ngun taka an ngaihtuah a pawimawh tak zet a ni, a ti.
Keynote address petu, Dr.K.D.Gupta, Chairman, IASRD chuan India ram-in bio-fuel leh green energy a hmalak a mamawh zia tarlangin India ram-in tuialhthei a mamawh za zela 83% chu ram pawn lam atanga a lakluh a ni tih a sawi a. Ei leh barah te, sum leh pai dinhmunah te chak taka a than mek laiin India ram chu khawvela energy mamawh hnem ber ram 6-na a ni mek a. Hemi atana a sum senso titlem a, leilung leh boruak chhe zel tur veng turin thlai leh thil dang atanga energy siam chhuah lamah nasa taka tan a lak a ngai a. Thlai chi hrang hrang, Jatropha, Karanza, Jojoba, Neem leh Fu te hi bio-fuel siam nan hman mek a ni a. Kum 2003 atang khan Fu chinna state lian 9 leh Union Territory 4 te chu lirthei ah 5% Ethanol Blended Petrol (EBP)hman tir an ni tawh a ni.
Tun tum seminar hi IASRD-in hetiang seminar a buatsaih vawi 11-na niin Ministry of Earth Sciences leh Ministry of New & Renewal Resources te bakah Rural Electrification Corporation(REC) leh Indian Oil Company(IOC) ten seminar senso hi an tum a. Rotarian Pu Dunglena’n a hawnna inkhawm hi kaihruaiin chawhnu session vawi khatna ah Pu Saurabh Dutt, Chief Manager (Bio-fuels) IOC, New Delhi kaihhruai na in thupui pahnih, “Harnessing renewable sources of energy to meet the energy demand of villages in off-grid areas” leh “ Application & importance of gasifiers based renewable energy to suppport rural electrification” tih ngaihthlak leh sawiho a ni a. Session vawi 2-na chu Dr. Arvind Shukla, Co-ordinator, Jatropha & Professor Department of Genetics & Plant Breeding, G.B. Pant University of Agriculture & Technology, Uttarakhand chuan kaihruaiin thupui, “Promotion of bio-fuel to ensure energy security of the country” tih ngaihthlak leh sawiho a ni bawk.
