2833/2024-2025

Aizawl, 5th November, 2024 : Mizoram State Biodiversity Board chuan vawiin khan Chief Wildlife Warden Conference Hall, MINECO-ah Biodiversity Management Committee (BMC) Member-te tan Capacity Building & Training a buatsaih a. Environment, Forests & Climate Change Department Minister Pu Lalthansanga chuan khuallian niin Capacity Building & Training hi a hawng a ni.

Capacity Building & Training-ah hian Mizoram chhunga BMC thlanchhuah 12 atangin member 24 an tel a, heng BMC te hi – Kawnpui-I BMC, Khawbel BMC, Khamrang BMC, Leng BMC, North Lungleng BMC, NE Tlangnuam BMC, Phulpui BMC, Sailulak BMC, Sairep BMC, Teikhang BMC, Keifang venglai BMC leh Pangzawl South BMC te an ni a. Heng BMC te zinga bank account hawng tawh BMC 4 hnenah Minister hian hmalakna atana bul an tanna tur Rs 20,000/- theuh a hlan a, BMC dangte pawhin bank account an hawn veleh pawisa hi an dawng dawn a ni.

BMC member kalkhawmte hmaah fuihna thuchah sawiin khuallian Pu Lalthansanga chuan BMC mawhphurhna leh hnathawh tur hi a tamin a zau hle a, nungchate leh ramngaw humhalh kawngah sawrkar tha tichak a, mipuite rilru puthmang a dik zawnga kaihhruai kawngah an tangkai hle dawn tih a sawi a, an pawimawhna hria a theihtawp chhuah turin a chah a ni.

Vawiin training hi session hnih ah then a ni a, chawhma lamah training hawnna hun hman niin Dr. B. Malsawmkima, Scientific Officer, MSBB chuan he hun hi kaihruaiin, Pu AK Biswal, PCCF, Mizoram chuan keynote address a pe a, Pu Pee Lee Ete, CWLW & Member Secretary, MSBB chuan lawmthu sawina hun hmangin session khatna hi a titawp a ni.

Chawhnu lamah Capacity Building & Training Programme hman niin, Dr. Lalneihpuia Chhakchhuak, Senior Scientific Officer, MSBB chuan kaihruaiin BMC chungchanga hriattur tul leh pawimawh chi hrang hrangte zirho a ni a. Biodiversity awmzia leh pawimawhnate, BMC te chanvo, tihtur leh mawhphurhna bakah hmalak dan tur chungchangte, Bioresources atanga hlawkna BMC leh khawtual mipuiten an tel theih dan tur chungchangte zirho a ni.