National Population Register siamna tura Biometric Enrolment chu tukin atang khan Mizoramah bul tan a ni a, Chief Minister Pu Lal Thanhawla chu a chenna bungalow-ah kal chilha chhinchhiah hmasak ber a ni. Chief Minister zawhah hian a nupui leh fanaute chhinchhiah chhunzawm an ni.

Biometric enrolment-ah hian India rama cheng zawng zawng, kum nga chin chunglam te chu chhinchhiah vek tur a ni a, citizenship pekna erawh a nilo. Hetah hian hmel pum lang thei thlalak bakah mit naute pahnih leh kut zungtang zawng zawng zia thla laka chhinchhiah a ni ang a, hei hi mitin chhinchhiahnaah (Identity) hmangin fel taka vawn ani ang. Hetianga thla lak sak tawhte chu Identity Card abika siam, Unique ID (UID) digit sawmpahnih nei, Aadhar Number tia hriat chu pek an ni anga, he Unique ID Card hi banking, mobile phone connection, ration card, passport leh sorkar thil pawimawh hrang hrangah mahni nihna dik tak finfiah nan India ram hmun tinah hman theih a ni ang.

National Population Enrolment hi state dangahte chuan kalpui tawh a ni a, a chhinchhiah hna hi uluk angaih bakah a chipchiar avangin hun duh tura ngaih a ni. Chief Minister te chhungkua tih zawh hian Zarkawt veng atanga hna chhunzawm tum a ni. Khaw hrang hrangah camp vawi hnih zel siamin, official ten a hmunah kal chilha enrolment hi tih tur a ni dawn a. Hemi hun chhunga kallo te chu sorkarin a hmun bik a siamah an mahniin an inbuaipui angai tawh ang. Hetianga hun bithliah chhunga tilo te chu National Pupulation Register ah chhinchhiah an nih ve dawn loh avangin India ram chhunga cheng anga ngaih theih an ni dawnlo a ni.

Registration ti tur hian Enrolment Agencies pahnih, LYRA Consultancy Service, Kolkata (LCS) leh Integrated Systems & Services (ISS), Guwahati te rawih an ni a, LCS hian Mizoram district pangaah kalpuiin, ISS hian district dang pathumah an kalpui ve dawn a ni.

Biometric Enrolment buaipui tu hi Registrar General of India (Census), Ministry of Home Affairs, New Delhi, Aizawl District Magistrate leh Central sorkar hnuaia Census Office, Aizawl te an ni a. Tukin kahn RGI atangin Deepak Kumar Gupta, Dy Director-in a rawn ho a, Aizawl DC aiawh te leh Aizawla Census official-te an tel bawk a ni.