Ni 5.10.2013 (Inrinni) chawhnu dar 3 hian Lawngtlai District Bawrhsap Pu J.Hmingthanmawia chuan Lawngtlai District huam chhunga Palitical Party aiawh, MJA member te leh mi pawimawh hrang hrangte DC Conference Hall ah ko khawmin kan hma lawka inthlan lo awm tur chungchang a sawi pui.

Thusawiin Pu J. Hmingthanmawia chuan Election Commission of India chuan ni 4 October, 2013 tlai lamah khan Mizoram leh State thenkhat te inthlan hun tur chu a puang fel ta a, hei vang hian Election Code of Conduct pawh a nung ve nghal a ni. Political Party hrang hrangte chu Code of Conduct in a phut anga dik leh fel fai taka thil an tih a ngai a ni a ti. Bawrhsap chuan inthlanna kan kalpui dan a fel fai tawk leh tawkloh chu nitin thuneitu sang zawkte hnenah thlen zel tawh tur a nih angin harsatna awm palh emaw, complaint neite chuan District Level Complaint Monitoring Cell ah felfai taka thlen thin tur a ni a ti bawk.

He hunah hian Lawngtlai District Superintendent of Police Pu B.K. Singh pawhin thusawiin inthlanna dan bawhchhiate hremna tur chi dan tam tak tunah hian kan nei mek a, heng hremna te hi a na in, hrem nih palh chuan hma lam hun thleng min tibuai thei thil an ni hlawm, hei vang hian Party tinte leh Election in a kaihnawih thil khawihtu te reng reng chu, fel leh dik taka thil ti a, umzui leh hrem ngailova awm theuh turin a chah bawk.

Lawngtlai District Level Complaint Monitoring Cell Chairman Pu R. Lalsangluaia pawhin thusawiin Election Commission in inthlanna thianghlim kan neih theih nana dan a zamte hi kan zavai tana thil tha, tuemaw vulh bik leh tu emawte enhran bikna laka min vengtu tura duan a ni a, tha taka kan zawm hian kan vai tan a tha tlang a ni tiin Political Party te chu dan ang tak zela thil ti turin a chah bawk.

He hunah hian Chanchinbumite leh Political Party aiawhte hian District Election Officer, District Bawrhsap ni bawk chu an thil hriatfiah duhte leh harsatna awm thei nia an hriatte zawt fiahin inpawh tlang takin hun an hmang ho a ni.