Vawiin hian Lawngtlai District Research Office ah Lawngtlai District chhung khaw tina Register of Birth and Death te tan Annual Training buatsaih a ni a, naupiang leh boralte chhinchhiah kawnga sawrkar duh dan leh a hnathawh dan turte inhrilh thar a ni.

He Training hi Lawngtlai District Research Offiucer Pi H. Chhunkungin a kaihruai a, Annual Training an neih thin dan leh an neih chhan te sawifiahin neih a tul chhan te a sawifiah a ni.

Pi Biakchungnungi, Deputy Director, Economic & Statistic Department chuan kal khawmte chu an hna thawh dan tur chipchiar takin a zirtir thung a, piang leh thi te kan record na a an address te hi an Permanent address anga sawrkarin a ngaih a ni a, thlak leh mai mai theih a ni tawh lo. Lohtheihloh thilah chuan thuneitute phalna la in tlem a zawngte chu tih danglam theih a awm ve chauh a ni, a ti a. Piang chhinchhiah hi khua leh tui nihna chhinchhiahna (proof-na) a ni lem lova, ram chhunga thil thleng chhinchhiahna pakhat ve mai a ni, a ti bawk.

Pu Malsawmdawngzuala, Judicial Magistrate pawhin thusawiin, ram dang hual vela awm kan nih avanga fimkhur a tul dan te a sawi a, tlai khawhnua Birth Certificate dil, an pian hun leh an pianna khua nia an sawi diklo leh phuahchawp te pawh a awm nawlh nawlh fo mai a. Chu chuan sawrkar atanga khua leh tui dik takte chanvo dawn tur thlenga a nghawng theih si avangin, Register of Birth and Death ten fimkhur takin engkim kan kalpui a ngai a ni, a ti.

Lawngtlai District chhungah hian Register of Birth and Death 81 an awm mek a, an zinga 70 ten vawiina Annual Training hi an hmang a ni.