Vawiin khan Pu Lal Thanzara Parliamentary Secretary to Chief Minister chuan Sakawrtuichhun a ruihhlo ngaite leh ruihhlo avanga harsatna neite  enkawlna  hmun ‘Blessing Home’ kum sawmhnih tlin lawmna inkhawm an Chapel-ah an buatsaih chu khuallian niin a hmanpui a.

Pu Lal Thanzara chuan Mizoram ah ruihhlo ngaite enkawlna mimalin Pathian rawngbawlna leh kohna ah ngai a Home an din thin chu ropui a tih thu sawiin state danga hetianga tlawmngaih chhuah  a Home din a hriat loh thu a sawi a. Pu Lal Thanzara hian Sorkar pawhin ruihhlo ngaite enkawl chu a ngai pawimawh a, tiin Sethawn a ruihhlo ngaite enkawlna hmun chu thuamthat a nih theih nan ngaituahna sen mek a nih thu a sawi.

Pi Lal Riliani pawhin inkhawm a hian thusawiin ruihhlo ah hian vaihlo leh a kaihhnawih te pawh hi an tel reng a ni tih hriat a tul thu sawiin a Home thawktute chu vaihlo leh a kaihhnawih a fihlim turin a chah a.  Blessing Home enkawltute inpekna leh thawhrimna chu Pathian ropuina a ni tiin an rawngbawl zelna kawngah duhsakna a hlan bawk a ni.

Blessing Home hi Pu V L Ruata Ralte in kum 1991 khan zu leh drugs avanga harsatna tawk te, Mizo tlawmngaihna leh Pathian thu nena enkawl dam leh nun kawng dik an zawh leh theihna tura  din a ni a. Blessing Home hi mi thilphal leh mi tlawmngaiten Pathian rawngbawlna atana thilpek – ram leh sum pai hmanga din a ni a. A din tirh atangin mi 1527 an enkawl tawh a, tunah hian mi 32 an enkawl mek in, thawktu 13 an awm bawk.