India leh Myanmar Border Liaison Officer Meeting Falam- a neih a kal Champhai DC Pu Vijay Kumar Bidhuri, IAS leh a Team te chuan dam takin October 19 tlai khan Champhai an thleng leh ta.
Vawiin chawhnu dar 1.30 khan Champhai DC hi BLO Meeting-a an kal chungchang hi DIPRO Pi K.Laldingliani leh Media thenkhat hnenah report a pe a, Myanmar-a Falam District Deputy Commissioner Pu Soe Thit chuan a theih ang tawka ropuiin a lo dawngsawng tih a sawi a, Zokhawmawi atanga Falam thlengin venhimna uluk tak hnuaiah an lo hruai thu te, Falam khaw daiah ropui taka an lo hmuah thu a sawi.
BLO Meeting hi ni 18.10.2011 -ah, an ram sana-a zing dar 9.00 (India rama zing dar 8:00)ah neih tan a ni a, ram pahnih inrina laiah boruak muanawm leh inthian thatna tha tak a awm zul zel theihna tur atan point hrang hrang an sawiho te chu a tlangpuiin pawm vek a ni tih DC hian a sawi a, chung zingah chuan Ruihhlo-a sumdawnna chungchang te, Myanmar mi, Mizoram-a thil ru, ramri kan te leh thil sual dang tite manchhuah an nih theihna turin leh inbiak pawh zung zung theihna turin tun aia chak zawka thawhho nise, an ti a, hemi atan hian Telephone number te pawh an in petawn nghal a ni. India sorkar-in Drug Testing Kid, an mamawh ang zat pek remtih a ni a. Ramsa leh ramngaw hausakna Nauban leh Sandalwood, Myanmar-a tawlhruk tih tawp dan tur te uluk taka sawiho a ni a. Chapchar Kut leh Kut pawimawh dang a awm nikhua-ah Champhai District leh Falam Disti ct chhungah Cultural Exchange neih thin nise tih te, Ministry of Home Affairs leh Mizoram sorkar in ramri atanga Km. 16 chhung zalen taka inkalpawh a phalna chu Mizoramah tha taka kenkawh a nih ang hian he order hi Myanmar lamah pawh hman ve nise tiin rawtna thlen a ni. Heng bakah hian Falam DC Office ah Mizo tawng thiam pakhat tal hnathawk-a ruai tura rawtna chu pawm a ni a. Champhai DIET ah Myanmar official-te tana English zirtirna buatsaih turin rem tih a ni bawk a. BLO Meeting neih leh na hmun atan Champhai an ruat a, a hun atan kumthar, Thal boruak nawm lai an ruat bawk. BLO Meeting-ah hian Chin State-a sorkar hotu lian ber, an Secretary U Nay Win pawh rawn tel ve in Champhai DC hi chibai a rawn buk bawk.
Nikum December 12,2010 khan Champhai DC Conference Hall-ah BLO Meeting vawikhatna hi neih a lo ni tawh a, he hunah hian India aiawhin Union Home Ministry mi pawimawhte leh Mizoram sorkar mi pawimawhte an tel a, Myanmar a Chin State hotu lian te an rawn tel bawk a, hemi tum hian India chuan Myanmar sorkar hnenah Bolero 4 wheel pakhat, Bike 3, Diesel Generator pakhat, Computer set 3 leh Wireless set 6, a vaia cheng nuai 20 man vel chu a lo pe tawh a ni.
BLO meeting vawi 2-na, Myanmar ram chhung Falam-a neihah hian Mizoram sorkar aiawhin Champhai DC bakah Pu Lalzirmawia Chhangte, Dy. Secretary (Home), Pu C.Lalthanmawia, Suptd. of Police, Champhai, Pu Lalhmunsanga DC, Excise & Narcotics, Aizawl, Pu R.Zarzosanga, Addl, DC Champhai, Pu Ngursangliana, Addl. SP, Champhai leh Pu James Lalnunmawia, SDO(Sadar) Champhai an kal a. Central sorkar aiawhin Pu Vijay Kumar Shahasane. Asst. Director, Narcotic Control Bureau, MHA, Pu Loverson Kuruvilla. Asst. Director WCCB, Ministry of E&F leh Pu Neihsial, Suptd., Land Custom Station, Zokhawthar te an tel a ni.
