Nimin chawhnu khan Home Minister Pu R.Lalzirliana chuan Saitual a Police Station Building sak thar chu a hawng. Building hawnna inkhawm hi Forest& Environment Minister Pu H.Rohluna pawhin a telpui a. Building hawnna inkhawm hi Pu L.Hrangnawna IPS, IGP chuan a kaihruai a; Police hotute thahnem tak an tel bawk a ni.

Pu R.Lalzirliana chuan Police Station Building thar, tha taka sak leh a hun taka peih fel a ni chu lawmawm a ti a. Home Minister hian Police hna thawh chu fakin, an hnathawh thatna, an thawhrimna leh an thawhhona te a that avangin Sorkar chuan hming thatna a khum fo a ni a ti. Tunhnai a hel ten an rukbo hnamdang pahnih Mizoram Police in sum tlan lova, operation hmanga a an chhanchhuah theih chuan Mizoram Police te chu an hna ah an in pe zo hle a ni tih a tarlang a ni a ti.

Pu R Lalzirliana chuan Pathian rinchhana hna thawh hian hlawhtlinna a awm ngei theih thu sawiin mipui kalkawmte chu mahni lam chauh in en lova midangte tan malsawmna ni turin a chah a. Saitual leh a chheh vela hmasawnna hna hrang hrang thawh mek te tarlangin Home Minister chuan heng hna te hi a thawktuten an thawh that loh chuan sawisel turin mipui a chah bawk a ni. Sorkar atanga tanpuina lo kal sem danah Village Council hruaitute chu a mamawh ngawih ngawih te, hmeithaite leh mi hnuai hnung zawk te thlang turin a chah a.

Saitual Police Station Building hi RCC in chhawng hnih a sak a niin building zau zawng chu 340.51 sq.m a ni. Building thar hi cheng nuai 69.16 hmang a sak a ni a; a satu contractor chu Pu R Liantluanga a ni. Basement floor ah hian pindan panga - Barrack, Record Room, Wireless Room, Womens’ Rest Room leh Conference Room te dah niin Ground Floor ah chuan pindan paruk - Lock up, officer room pahnih, malkhana, armoury leh staff room te dah a ni. Pindan tinah Ceramic tiles phah vek a ni. Saitual Police Station hi March ni 10, 1974 din niin tunah Police 25 vel an thawk mek a ni.

Nimin zing Ngopa a chhuahsan hma hian Home Minister chuan Ngopa Police Station a tlawh a; hnathawktute hian an harsatna tawh leh an mamawh te Minister hnenah an thlen a ni.