Vawiinah kum tling tharte tan bika Electoral Roll-a inthun theihna tur Special Enrolment Drive neih tur chungchangah Aizawl district-a BLO ten Vanapa Hall-ah training an nei. Aizawl district chhunga khawsa, kum 18-21 inkar Electoral Roll a la chuang lo te tana Roll a inthun theihna hun, Special Drive July thla chhungin neih tur a ni a. He mi hun chhung hian mitthi tawh Electoral Roll-a hming la chuangte Roll atanga an hming paih tur a ni bawk.
July thla chhungin BLO-ten an bialchhunga vote nei theite zawng chhuak turin form kengin in an tlawh kual dawn a, Roll-a luh dilna form an hnenah thehluh theih a ni ang. Special Camp July ni 8 leh ni 22-ah Polling Station tinah huaihawt tum a ni bawk. Polling Station tinah BLO-te form lo dawng turin leh dilna thehlut duhte lo pui turin an thu dawn a ni. Electoral Roll copy BLO-in a kawl atangin roll-a mahni hming awm leh awm loh en theih a ni ang.
Additional DC, Aizawl Pu JH Lalrimawia chuan Roll-a lut thei, kum tling thar zawng zawngte chu Roll-a inziak lut vek turin a hriattir a. Mitthi tawh Roll-a hming la chuangte paih kawngah BLO-te lo pui zel turin mitinte a ngen nghal bawk. Kum tling thar Electoral Roll a thun theihte a tam thei ang ber thun an nih theih nana theihtawp chhuah pui turin political party-te leh NGO-te a sawm bawk a ni.
