Vawiin khan Chief Electoral Officer Pu K.Riachho chuan Agriculture Conference Hall, Aizawlah ni hnih awh tur Training of Trainers for Training Booth Level Officers a hawng. He training hi Aizawl, Mamit, Kolasib, Serchhip leh Champhai District-ah te buatsaih a ni.

Pu K.Riachho chuan 1.1.2013 a kum tling thar zawng zawngte thun turin Electoral Roll Special Summary Revision neih a ni dawn a, Electoral Roll ennawn hi kum tin neih thin ni mahsela kum thar November thlaa Mizoram Legislative Assembly (MLA) inthlanpui kan hmachhawn dawn avangin tun tum bik hi a pawimawh lehzual hle a ni, a ti. Roll Revision-a thawktu zawng zawng te a theih chen chenah inthlan lam hawi dan te zirchianga turin leh Election Commission of India-in inkaihhruaina dan a siam te chiang taka hre turin a chaha, hnam leh chi bing lam rilru pu lo tur leh dik tak leh huaisen taka India khua leh tui, kum tling chin apiang chu hmaih awm hauhlo a Roll-a thun vek turin a chah bawk. Chief Electoral Officer chuan ERO leh AERO ten an mawhphurhna an hriat chian a tul hle tih sawiin Roll Revision ah kum tlin thar, kum 18 leh 19 te an thun kim tawk lo thin niin a lan ga, chuvangin kuminah chuan heng mite hi kim taka thun vek tura tan lak a tul hle a ni, a ti.

Mizoramah EPIC/ PER ah 100% kan hlawhtling tawh a, hei vang hian Mizoram hming pawh a tha hle tih sawiin Pu K. Riachho chuan kum dang zawng aia fel fai leh dik a kumina Electoral Roll Revision hi kalpui a nih theih nan sorkar Department hrang hrang bakah tlawmngai pawl te, Political Party te leh Local/ Village Council te leh thuthar thehdarhna lama thawk zawng zawng te thawhpuiah a sawm a ni.

Training hawnna inkhawm hi Jt. Chief Electoral Officer Pu H. Lalengmawia’n a kaihruai a, Lunglei EO Dr Andrew H.Vanlaldika, ACEO R. Vanlalsawta leh Saiha EO H. Lalhmingthanga ten thupui pawimawh hrang hrang hmangin zirtirna an pe a ni.