Vawiin khan Parliamentary Secretary Pu K.S Thanga chuan Aibawkah Bharat Nirman Rajiv Gandhi Sewa Kendra (BNRGSK) Building, cheng nuai sawmhnih chuang senga sak a hawng.

Building hawnna inkhawmah hian thu sawiin Parliamentary Secretary chuan helai tlangdung hi tunhma atangin Bial hnu chhawn nia inngaihna a awm thin a, amaherawhchu tun hunah chuan Bial inlungrual leh hmasawnna kawng hrang hrangah pawh a chak ber pawl a ni thei ta hial a ni, a ti a. Hmasawnna hna chak taka a kal theih nan bial chhung mipui te pawhin sorkar an tawiawm thiam a, thawhhona tha tak an neih reng a tul a ni, a ti. NLUP chungchang sawiin Pu K.S Thanga chuan theihtawp chhuaha taimakna nen he Policy tha tak hi hlawhtlinpui ngei turin a fuih a. A dawngtu ten rinawm leh dik taka an sum dawn te an hmang a nih phawt chuan chhungkaw dinchhuah nan an hmang ngei ang tiin chu chu sorkar pawhin an laka a beisei leh he Policy a duan chhan a ni, a ti.

Building hawnna inkhawm hi Aibawk RD Block BDO Pu R. Vanlalsawma’n a a kaihruai a, BNRGSK Work Manager Pu P. Lalsangpuia’n Technical Report a pe a ni.