Vawiin khan SIRD&PR Conference Hall - III, Durtlang Leitan, Aizawl-ah ni thum chhung (11th Septermber 2019-13th September, 2019) awh tur Mizorama Block Development Officer (BDO) te tana training buatsaih - “Refresher Training Course for Block Development Officers (BDOs)” chu tan a ni a, Pu V.Lalsangliana,Additional Secretary, Rural Development Department chuan khuallian niin a hawng.

Training hawnna inkhawmah hian khuallian Pu V. Lalsangliana chuan thu sawiin tun hma a sum tam tak tak senga NIRD, Hyderabad leh Guwahati-a training nei tura kal ngai thin chu ngai tawh lovin Mizoram chhung ngei a training neihna tur SIRD&PR tha tak mai kan nei ta hi a lawmawm hle a ni a ti a. BDO te chu a hmun (field)-a thawktu tak tak te an nih avangin an tan ram leh khawtlang tana thil tha tih theihna hun tha a ni a, hriat reng tlak hna tha an thawk thei a ni tiin, chutiang hna tha, hriat reng tlak thawk tur chuan tan la turin a chah a. Chutiang bawkin hna hriat reng tlak loh leh chetsual theih hun lai a ni h bawk avanga fimkhur tak leh dik taka hna thawk turin BDO kalkhawm te a fuih a ni. BDO te hian thil tih tur leh mawhphurhna an ngah em em avangin chutiang hna thawh tur leh tih tur hrang hrang ah chuan Inkaihhruaina dan (Guidelines) te an hriatchian a ngai em em a, Inkaihhruaina dan (Guidelines) hriatchian anih chuan dan bawhchhe si lovin hna tha leh tangkai a thawh theih thin a ni a ti bawk.

Training hawnna inkhawm hi Pi Florence Zotluangpuii, Director, SIRD&PR/Rural Development Department in a kaihruai a, Training Course Director Pu Khuangthansanga Pakhuangte, Senior Core Faculty (R.D), SIRD&PR-in training chhunga hun hman dan tur tlangpui a sawifiah a ni.

He training-a tel BDO 14 te chu thupui thlan chhuah hrang hrang hmangin SIRD&PR Faculty te leh mithiam sawm bik ten an zirtir dawn a ni.