Tun Inrinni liam ta February ni 16, 2013 khan Pu John Rotluangliana Deputy Speaker, Bialtu MLA ni bawk chuan BNRGSK Building Rs 102.458lakhs senga sak chu khuallian niin a hawng.

Hawnna inkhawm DRDA Office tualzawla neih Pu V. Lalremthanga Deputy Commissioner, Mamit kaihhruaiah thusawiin khuallian chuan District danga la awm ve lo Building changtlung tak leh chhenfakawm tak tur sak puitlin a ni chu lawmawm a tih thu a sawi a, thawktu te fakin an chungah lawmthu a sawi a ni. Sorkar ruahmanna in Mamit-ah Department thar hawn belh zel tum a ni a, chumi atan chuan ram mamawh thin a nih avangin mipui lam pawh khawtlang hmasawnna atan an ram te ui lova lo pe turin a ngen a ni. NLUP Scheme hnuaiah chak taka hma lak mek anih thu a sawi bawk.

Pu Lalrinmawia Ralte Parliamentary Secretary, Home etc pawhin thusawiin Mamit District chu hnam hnufual leh tenau zawk (minority) te awm tamna hmun a nih avangin a bik takin sawrkar in a ngaihtuah hle tih a ni tiin hetianga Building tha tak mai sak a ni ta chu lawmawm tak zet a ni, a ti.

Pu V.L Robiaka Chairman ZIDCO pawhin thusawiin tun dinhmunah Mamit District chu hnufual deuh rih mahse Sawrkar in chaktakin hmasawnna a kalpui mek zel a ni a ti a. Mamit District chuan hmasawn zel turin theihna (Potential) an neih that thu sawiin rinawmna, taimakna, Pathian hre chunga sawrkar leh mipuiin tan an lak chuan District hmasawnna leh changkang berah a siam theih a ni tih a sawi bawk.

BNRGSK Building hi T-shape sak niin 75X28ft, 72X23ft, 3756 sq ft awh a liana sak a ni a, Building hi chhawng li a sak ni a, June 2011 a sak tan niin ni 9.1.2013 ah sak zawh a ni kawng hrang hranga hman tangkai theih tura duan a ni a. He Building ah hian Staff Quarter 9, hnam hnufual zawkte thlen theihna tur khum 17, awmna(minority inn-cum-facilitation Centre), Mamit Joint V/C Hall, VIP riahna tur room pahnih leh training hall te a awm a ni.

BNRGSK Building hawnna ah hian Pu John Rotluangliana, Deputy Speaker, Bialtu MLA, Pu Lalrinmawia Ralte, Parliamentary Secretary, Home etc., Pu V.L Robiaka Chairman ZIDCO, Pu V. Lalremthanga Deputy Commissioner Mamit te bakah Officials engemawzat an tel a ni.