1299/2026-2027 

Dated Aizawl the 4th July, 2026 : Nimin Ni 3, July 2026(Zirtawpni) khan Board of Trade Meeting, Vanijya Bhawan, New Delhi a neih ah Commerce & Industries Minister  Pu F Rodingliana a tel a. Sawhthing leh mau sawngbawlna leh Mizoram-a industry hmasawnna tura mamawh leh tulte a thlen a ni.

Pu Piyush Goyal, Union Minister of Commerce & Industry leh Pu Jitin Prasada Minister of State for Commerce & Industry te kaihhruaina hnuaia neih Board of Trade Meeting ah hian Commerce & Industry Minister Pu F Rodingliana chuan thu sawiin Mizoram chu ‘Ginger Capital of India’ ni thei tur khawpa sawhthing a tharchhuah nasat thu sawiin a hralhna chhuahna leh a sawngbawlna tur processing unit lian tham din kawngah Ministry puihna a mamawh thu a thlen a, Mizoram mau te chu textile leh paper industry atana chhawr tangkai dan dap pui turin a ngen bawk a ni.

C&I Minister Pu F Rodingliana hian Board of Trade memberte leh C&I Ministry hotute hnenah India Sorkar in Kaladan Multi-Modal Transit Transport Project (KMTTP) a buatsaih mek, a puitlin tep chu State dang leh India rawn pawn thlenga insumdawn tawnna kawngah Mizoramin a chhawr tangkai ngei theihnan ruahmanna siamsak turin a thlen a. Agartala atanga hmui lova Mizoramah MSME-DFO office hawng turin ngenna a thlen bawk a ni.

Board of Trade hi foreign trade policy, export promotion leh manufacturing lama India Sorkar kawng kawhhmuh tura apex body din a ni a, Directorate General of Foreign Trade(DGFT) hnuaiah awmin, member ah hian Sorkar Official bakah industrialist leh India company lian hotute, banking, logistics, manufacturing leh IT lama mithiam bik te, industry chambers leh exports council hotute an tel a ni. C&I Minister hi Dr. H Lianzela IAS, Secretary Commerce, Industries, Geology & Mining Department in a tawiawm a ni.