Bonsai Association of Mizoram (BAM) buatsaih Bonsai Fair 2017 chu vawiin chawhma  khan Assembly Annexe Basement -1  ah Pi Lal Riliani, President, Indian Society on Tobacco and Health(ISTH) Mizoram Chapter in a hawng a. Bonsai Fair 2017 hi Horticulture Department bultuma huaihawt  a ni.

Pi Lal Riliani chuan Bonsai chu Mizo ten kan hmelhriatna la rei lutuk lo mahse hemi lama  inpete hmalakna vangin bonsai artist thahnem tak kan nei ve ta chu lawmawm a tih thu a sawi a. Bonsai chu art danglam tak ram changkang apiangin an ngaihsan a ni, a ti a. Bonsai enkawl tur chuan  zaidam, dawhtheih leh teirei peih a ngaia, a upat poh leh a hlutna a zual zel a ni, a ti a. Mizote kan vanneihna pakhat chu kan ramah thing mawi tak tak, Bonsaia siam theih tur a tama, heng te hi kan chhawr tangkai theih chuan kan ram chu ram mawi tak leh khualzinte hip nan kan siam thei dawn ani, a ti bawk. Pangpar khawi leh enkawl chu hmeichhiate chauh tihtur a ni bik lova, mipate pawhin hlawhtling takin an enkawl thei a ni, Pi Lal Riliani chuan a ti a. ISTH, Mizoram Chapter President chuan kalkhawmte chu taksa leh rilru hrisel zawk nei thei tur chuan zuk leh hmuam leh ruihhlo  chitin lakah fihlim a ngaih thu hrilh hriain hengte laka kan in sum theih chuan rilru fim leh fing zawkin hna kan thawk thei dawn a ni, a ti a. Pi Lal Riliani chuan Bonsai Association of Mizoram (BAM) hruaitute thawhhona tha tak chu fakawm a tih thu sawiin theih tawp chhuaha ram pawn thleng pha tura tan la zel turin a chah a. Bonsai Fair 2017 chu mipuite leh  buatsaihtu ten an hlawkpui theuh theih nan duhsakna a hlan nghal a ni.

Dr Elizabeth Saipari, Director, Horticulture Department pawhin thu sawiin Bonsai hmasawnna hmuh theiha a awm chu hmalatu  hmasa leh tuna hruaitu viak tha tak tak te vang  hi a ni, a ti a. Mizoramah Bonsai chu bul tan chauh mah ila, nakin zelah nasa  zawka hmalak kan tum anga, hemi kawngah hian Horticulture Department leh BAM te chuan tan kan la zel dawn a ni, a ti bawk. 

Bonsai Fair 2017 pual hian Bonsai inelna buatsaih a ni a. Inelnaah hian mi 17 telin, Bonsai an enkawl 96-te chu Horticulture lama mithiam ten tehna hrang hrang hmangin an endik a ni. Lawmman dawngtute chu: Pakhatna: Pu Zodinliana Hmar,  Pahnihna: Pi Thanchungnungi,  Pathumna: Pu Lalsiamkunga te an ni a. Heng bakah hian Consolation Prize mi 10  hnenah pek a ni a. Pu Vanlalmuanpuia Khiangte hnenah Col VL Ruata Memorial Award hlan a ni a. Bonsai Fair 2017 ah hian  chhimtu ten Bonsai tha an tih ber an thlan theih nan  ‘The People’s Choice’  vote thlakna siam a ni bawk.

Bonsai Association of Mizoram (BAM) hi August Ni 8, 2015 khan din a ni a. Tunah hian pawl member 100 vel an awm mek a. BAM  thil tum berte chu: Mizote zinga Bonsai tuite inpumkhat nana hmalak, thalai ten hunawl an hman that theih nana Bonsai hobby a neih tir leh Pathian thilsiam thing leh maute hlut zia Bonsai hmanga pholan te an ni.

Fair hawnna hun  hi Pu Zodinliana Hmar, Vice President, BAM in a kaihruai a. Secretary Pu Lalsiamkunga hnen atangin report ngaihthlak a ni a. Bonsai Fair 2017 hi nithum awh tur niin July 12-14, 2017 thleng neih a ni ang.

Attachment

  • Loading attachment...