Nimin khan Science & Technology Conference Room-ah Mizoram Remote Sensing Application Centre (MIRSAC)-in Champhai District chhunga grape chinna hmun tihpunna tur ram tha tarlanna map leh report bu, Satellite thlalak leh Geographic Information System (GIS) hmanga an buatsaih chu Horticulture Department Director Dr. Elizabeth Saipari hnenah an hlan a. Technology Mission on Integrated Development for Horticulture in NE States hnuaia Aizawl District chhunga sapthei chinna atan ram tha awmna map leh report bu an buatsaih chu 2003 khan an lo hlan tawh bawk a ni.  

Chief Scientific Officer leh Member Secretary (MIRSAC), Dr. R.K.Lallianthanga chuan Coordinated Horticulture Assesment and Management using Geoinformatics (CHAMAN) Project hnuaia grape chinna hmun tihpunna tur ram tha awmna map leh report bu buatsaih ani chu lawmawm atih thu sawiin grape wine thatna leh mamawhna a sang zel dawn a ni, a ti a. Vansang lam thiamna hmanga map leh report bu chu tangkai taka Horticulture Department-in an hman theih nan duhsakna a hlan nghal a ni.

Horiculture Department Director, Dr. Elizabeth Saipari chuan report bu  tunlai thiamna hmanga MIRSAC-in an buatsaih chu lawmawm tiin department lam pawhin an tangkaipui ngei a beisei thu a sawi a ni.

He hun hi Sr. Scientist Pi Hmingthanpuii chuan a kaihruai a. Scientist Pu Robert Lalchhanhima Sailo chuan technical report pe-in Champhai District chhunga grape chinna atan ram tha 43780.609 Ha a awm thu a tarlang a. Horticulture Department Dy. Director Pu Vanlalruata Chenkual pawhin thu sawiin Sr. Scientist, Pu ZD Laltanpuia chuan lawmthu sawina hun a nei a. Horticulture Department Officer-te leh thawktute bakah MIRSAC Scientist leh thawktute an tel a ni.