Vawiin khan Economics and Statistics Conference Hall-ah Mizo Academy of Letters (MAL) chuan an din champha (Foundation Day) vawi 55-na an hmang.

Khuallian MJA President Pu Zonunsanga Khiangte chuan ziak mite hi kan ram rohlu, tawng dik min zirtirtu leh thangthar zel tana kan tawng humhalhtu an ni tiin tunlaiah hian social media lamah kan tawngin tihduhdahna a tawk nasa a, a dik zawnga tan kan lak zel a pawimawh a ni, a ti a. MAL nena Mizo tawng dik ziah chungchanga workshop leh seminar neih ho tha a tih thu a tarlang a. Mizo tawngin hma a sawn zel theih nan 8th Schedule a dah a tul thu  a sawi bawk a ni.

MAL President, Prof. Laltluangliana Khiangte chuan kaihruaiin kalkhawmte lawmna thu a sawi a. Mizo tawng humhalh hi a tul tak zet a, hnamdang hming leh tawngkauchhehin a chimpil loh nan thapui chhuah a pawimawh a ni, a ti a. MAL Secretary Dr. Rualkhuma Colney chuan kum 2018-2019 chhunga MAL chetvelna hrang hrang report a pe a. Pu Zonunsanga Khiangte, MJA President chuan kum 2018 chhunga Mizo tawnga lehkhabu chhuak zinga tha ber, ‘Book of the Year 2018’ lawmman chu Mafaa Hauhnar (H. Lalrinfela) nu Pi Lalrinliani hnenah a hlan a. Lehkhabu hming hi ‘Hringnun Hrualhrui’ tih a ni. Thuziak cheimawi (Citation) leh tangkafai Rs. 5000/- a keng tel a. Chawhnu lamah Book of the Year 2018 top 3 ziaktute kawmna hman zui a ni.