Vawiin khan Ministry Of Culture, Gov't of India hnuaia North East Zone Cultural Centre, Dimapur leh Art & Culture Department, Mizoram huaihawtin GSA Playground Mamit-ah Border Area Cultural Programme hman a ni. Dr Lalrozama, IAS District Bawrhsap chuan khuallian niin he hun hi a hmanpui.

Khuallian chuan hnam inpumkhatna tura Cultural Programme hun hmang theia a awm chu lawmawm a tih thu a sawi a, hun hmang tura State dang atanga lokalte leh hun buatsaihtute chungah lawmthu a sawi bawk. India ram ropui tak maia, chengte chu ram zalenna hnuaia, inunauna, inthianthatna neia kan khawsakho dial dial chu Sawrkar laipui pawhin a tum a nih avanga, sum tak tak senga programme buatsaih thin a nih thu a sawi.

Culural Programme hmangtu zawng zawngte chu inpumkhatna, inkungkaihna tha zawk nei leh zual tura hun hmang tura chahin, India ram tiropui zual zel tura mahni theihna zawn theuhva hma kan lak chu kan zavaia mawhphurhna a nih thu a sawi bawk.

Pu F. Lalthanmawia, Programme Coordinator pawhin hun buatsaih a nih dan sawiin Ministry of Culture, Gov't of India hnuaiah hian India ram pumpui hi Cultural Zone 7-ah then a ni a. Chung zingah chuan NEZCC hi awmin, India Hmarchhak mite min huam a. Kumtin Programme chi hrang hrang siamin buatsaih thin a ni. Border Area Programme hi International Boundary hrula neih tura duan leh ruahman a ni a. Mizoramah pawh Vairengte, Champhai, Tlabung, Siaha ah neih tawh niin, tun tum ah hian a vawi 5-na turin Mamit-ah hian hman a nih thu a sawi. He Programme in a tum ber chu mihring inpawhna chu inhmuh tam leh in elna atanga piang a nih angin tawng in hre tawn theihlo mah ila, kan culture hrang hrang hmanga khawsak hona chuan rahtha a chhuah ngei a beisei thu a sawi.

Vawiin Border Area Cultural Programme hi Pu Lalmuanzova, Pachuau President YMA Chhimveng Branch chuan kaihruaiin India Hmarchhak State Pali Assam, Uttarakhand, Arunachal Pradesh leh Madya Pradesh, atangin Tahal Tungri Dance, Ghasayri Dance, Bro Zai Dance leh Jawara Dance te an entir a, Mizoram atangin Hmarveng, Venghlun leh Chhimveng YMA te'n Cultural Dance hi hrang hrang an entir bawk.

Border Area Culrural Programme hi nimin khan 4th IR Bn hmunah hlawhtling taka hman a lo ni tawh bawk a ni.