Nimin khan I&PR Department Mamit bultumin Pu Paul Rokima, DIPRO Mamit hovin MJA Mamit District te chuan National Highway 44A (NH 108), tuna Gaytri Infrastructure Pvt. Ltd hnathawh, kawng laih leh lei dawh mekte an en a. NH Div. - I Sr. EE Pu Lalzawmliana leh a hote'n an lo tawiawm a ni.

NH 44A kawngpui sial mekah hian lei dawh hna kalpui mek 4 a awm a. Chung zingah chuan Dialdawk lei chu dawh zawh tawh niin Damlui lei dawh mekah 17% peih tawh a ni. Teirei lei 48% zawh tawh niin Tripura dep New Eden khuaa Langkaih lei dawh mek chu 4% zawh tawh a ni a. Pile foundation 23 thawh zawh tawh a ni bawk. Heng an lei dawh mekte hi Langkaih tih loh chu kumin furpui lo thlen hma hian an hna khaihlak lo turin a zualpui peih hman an tum thu Contract hnathawkte hian an sawi a ni.

Tuna earth work (formation cutting) la thawh mek Dampui Khampui Metre 185 a sang (a sang lai ber) hi metre 37 vel laih a la ngaih thu tarlan a ni a. Excavator leh Vibrator khawl lian chi te'n a laih hna hi an thawk mek a ni. Kumin hian laih tlang ngei tumin ngawrh taka MPWD NH Division-I hotute vilna hnuaiah chak taka thawh mek zel a ni a. Laih tlang fel anih hunah chuan Mamit atanga Aizawl hi KM 75 vel ni tura chhut a ni. Heng bakah hian formation cutting la zo fel lo, Tuidam chho helna (Tuidam Diversion) chu laih hna ngawrh taka kalpui mek a ni bawk.

NH 44A Project Estimate hi tum hnih ennawn tawh niin a tum thumna atan hian Ministry lamah nawr mek anih thu tarlan a ni a. Tunah hian SEDP hnuaiah kawngpui hlui Dampui leh Tuidam (existing roads) leh Dampui khua atanga NH 44A panna thawmthatna tur sum eng emaw zat hmuh niin thawmthat hna hi kalpui mek a ni bawk. Hei bakah hian Dapchhuah leh Mamit peng inkar kawng, BRO kawng anih avanga fel mai thei lo pawh bialtu MLA kaltlanga Mizoram Sorkar hmalakna zarah tihfel anih tawh thu tarlan a ni bawk.

NH 44A Project hi 25.11.2010-ah Sanction niin Estimate Amount chu 624.41 Crores a ni a. 02.03.2011 khan hna thawh tan niin zawh hun tura ruahman hi 17.03.2014 a ni a. Zawh hun tura zawh theih anih tak loh avangin 17.07.2015-ah Extend a ni a. Zawh hman anih leh tak loh avangin 17.07.2017-ah extend leh niin peihfel hman a ni leh ta lova. A vawi thum nan 31.12.2020-ah zawh hun tur hi Extend a ni leh ta a ni. Forest Clearance hi Stage 1 Clearance hmuh tawh niin Final Clearance hi la nghah mek a ni a. Formation Cutting 98.36 KM laih tur niin 93.31 KM zawh tawh a ni. Revised Estimated vawi thum neih anih hnuah Estimate Amount MORTH-a pawm tura thehluh hi Rs 1136.45 Crores a ni.

NH Div. - I hnuaiah hian Sub Division pahnih awmin SDO post pakhat hnawhkhah lova awm chu an buai phah ve deuh thu PWD hotute hian an sawi a. New Eden Langkaih piah lam, Tripura ram lamah hian lang thei chinah engmah hna hi thawh a la ni lova, Mizoram lamah hian thawk zo pawh nise kan State pahnihte hemi kawng hmanga insumdawn tawnna tur hi a taka kalpui a la har deuh dawn thu PWD hotute hian an sawi bawk a ni.