Vawiin chawhma dar 11:00Am khan MADC Forest Hall-ah District Level Fire Prevention Committee, Siaha te buatsaih 'Mei kang tur veng la, i ram humhim rawh' tih thupui a hmangin Fire Prevention Week, 2020 hawnna hun hman a ni. Pi B. Malsawmtluangi, SDO(S) chuan he hun hi a kaihruai a ni.

Fire Prevention Week, 2020 a khuallian leh hawngtu nibawk Pu N. Zakhai, C.E.M., MADC chuan thu sawiin, Mei hi thil sual emaw thil thalo chu a ni hauh lova, a tello hian kan khawsa theilo zawk a ni. Mahse kan mamawh bak a thil tullo leh kan tana tangkai silo, kan nunna hnar ramngawte kan han tihkan hian thilsual leh ram hmelma chu a lo ni zawk a ni, a ti a. Mihring dam khawchhuahna leh kan nun nana kan mamawh tam zawk hi he kan thing leh mau, nungchate hi an ni tiin, chungte chu humhalh leh dimdawi a hnekin, kan ti chereuin, kan tihlum duh zawk si a, Ringtu nun nen a inperhsan hle a ni, a ti bawk. Kan rama kangmei chhuak tam zawk hi chu tiluihna avang leh fimkhur tawk lovang a thleng thin a ni tiin, kangmei laka kan lo him zawk nan, kan lo leh huan hal dawnin mei kawng sial thain, kan ram chin bak tikang lo tum theuh ila, kan In ngei pawh Electric Wiring thiamte ngei tihtir nachang i hrethar leh ang u, tiin kalkhawmte chu a chah a.He kangmei ven hna hi Forest Department leh Fire & Emergency Department tihtur chauh a ni lova, kan vaia mawhphurna a ni, a ti bawk. Ti kangtu ni lovin, thelhmittu nih i tum theuh ang u, tiin mipui kalkhawm te chu a chah bawk a ni.

Pu Jimmy N. Ramdina, ACF, MADC chuan an Department hnathawh leh an hmachhawp hrang hrangte bakah kumin chhunga an hmalakna hrang hrangte sawichhuahna hun hmangin, programme kar lakah zaithiam tak zaite ngaithlak a ni bawk.

Environment & Forest Department, MADC ten tunhnai a an thil man heng - Air Riffle panga, Sangha manna Dynamo set khat, Sava thang thahnem tak bakah Sairawkherh leh Sava thahnem tak an man te chu khuallian Pu N. Zakhai chuan a halral nghal bawk a ni.

Pu FC. Lawmkima, Executive Member i/c Forest Deptt. chuan lawmthu sawiin he hun a titawp a ni.