Vawiin khan Governor P.S. Sreedharan Pillai leh Lady Governor Reetha Sreedharan te chuan Saitual, Saitual District khawpui an tlawh. Governor pual hian Saitual Auditorium-ah vantlang inkhawm buatsaih a ni a. Hemi hnuah hian Governor chuan Community Health Centre, Govt. Saitual College, Salvation Army enkawl hnuchham run 'Hlimna In' leh Tamdil te a tlawh bawk a ni.

Vantlang inkhawmnaah Governor P.S.Sreedharan Pillai chuan thusawiin Saitual District mipui ten duhsak taka an lo hmuak leh an lo dawngsawng chu thinlung taka a lawm thu a sawi a. Hunteilote a lo awm chhunga a hmuhchian em em chu Mizo mipui te hi an rilru a tha tih a nih thu sawiin chu chu Prime Minister hnenah pawh Mizote chungchang a sawi dan a ni a ti. Mizoram ralmuang tak, hmeichhia leh naupangte thlamuang taka pawna an chhuah ngamna hi ka chhuang em em a. State dangte tan pawh state entawn tlak tak a ni a ti.  Governor chuan, "Saitual khua hi tuhmain sakhuana avanga tihduhdahna tawktute tlankhawmna leh inhumhimna hmun a ni tih ka lo hre tawh thin a. Saitual leh India hian inanna tak an neih chu sakhuanna avanga harsatna tawkte thlamuang tak a awm awmkhawmna a ni", a ti a. Khua leh tui tha kan nihna angin India ram chu ram chak tak, sakhaw hrang hrang betute inngeih taka awmna leh inlungrualna hmun a nih zel theih nan mitin mawhphurhna sangtak kan nei theuh a ni a ti. Hunrei tak chhung District nei tura hma an lo lak tawna te avangin Saitual District mipuite chu an tangrual tha hlein a ring tih a sawi a. Tanrual chu chak leh hmasawnna a nih avangin Saitual District pawhin hmalam hun eng tak a nei ni a ti. Saitual District awmna lai chu kawng hrang hranga pawimawh - ram laili ni tho si, Manipur leh Myanmar ramri hrul ni bawk si a ni a. Tin, Manipur kalpawhna kawngpuiin a tan tlang district a nih bawk avangin Saitual tan remchanna tam tak, sumdawnna leh thildangah te a awm rualin mipuite erawh pawnlam atanga thil thalo hrang hrang rawn lut thei lakah an fimkhur tel a ngai thung a ni a ti.

Govt.Saitual College zirlaite hmaa thu a sawinaah Governor chuan zirleiten enge kan ram mamawh thiamna tih lam hawia inzir turin a chah a. Degree neih ringawt leh ziak leh chhiar thiam ringawt chu eizawnna atan a tlak tawh lo tih a sawi a. "Mahni kutkea eizawnna insiam tum tur leh in hmathlir fing tak avanga in hlawhtlinnah te Mizoramin hlawkna tel se ka duh a ni", a ti a. Hlawhtlinna ringawt ngaihtuah a pawimawh ber lova midangte nen kan inrem em?, vantlang tan ka tangkai em? tih te tunlai khawvelah hian ka mamawh zual hle a ni a ti. Subject tha bik a awm lo tih a sawi a. Subject zawng zawng erawh a pawimawh vek thung a ni a ti. Arts subject la te pawh Science Subject la aia indahhniam chuang lo tura chahin khawvela mi hlawhtling ber ber leh sumdawnna lian tak tak enkawltute zingah mi tam tak chu Arts Graduate an nih thu a sawi a. Tin, zirlai zirtirnaah pawh zirlaite mizia hlawk thei ang bera phawk chhuak thei tur zirtirna kalpui dan zirtirtute ngaihtuahnaah pawh awm se a pawimawh a ni a ti. "Zirlaite hnena ka chah duh chu in hnathawh duh leh nih tum milin zir ula. Skill Development lamah leh vocational training lamah te kal uar ula ka duh a. In khawhawi tizau ula, fimkhur takin in tuina leh thiamna lam kawng zawh ula in hmalam hun atan pawh  tifuh ngei ngeiin ka ring a ni", a ti.

Governor chuan   Community Health Center, Saitual a tlawh leh a. Damlo te tlawh kualin Damdawiin hmuhma te leh an bungraw neih te a ensak bakah Staff dinhmun te a zawtchiang bawk a ni. Governor chuan Dr Lucy Lalsangpuii h enah Saitual CHC poor fund atan pawisa a hlan a. Tun dinhmunah Saitual CHC hian mipui 20,000 bawr vel a enkawl mek a. Saitual CHC-ah hian Medical Officer 4 leh Nurse 10 an awm mek a; damlo mutna khum 30 a awm a, inzai tenau, nau neih, insiam, ha phawi leh Laboratory Test tul zual te a tih theih a. Saitual CHC Lab tih changtlunna tur Auto Analyzer bakah CHC in a mamawh  Ambulance te pawh Governor chuan sawrkar thuneitute a lo sawipui tur thu Hospital enkawltute hi a hrilh a ni.

Salvation Army in Integrated Children Protection Scheme(ICPS) hnuaia Hmeichhe Naupang enkawlna in a kalpui mek, 'Hlimna In' pawh Governor leh Lady Governor te chuan an tlawh nghal a. He hmunah hian a enkawltu Major Ramropuinghaki leh a thawhpui ten an lo dawngsawng a ni. Naupangte nen inkawmna hun hmangin Governor hian thilpek a hlan a. Tunah hian Hlimna Inah hian Hmeichhe Naupang 9 enkawl mek a ni.

Vantlang inkhawm programme hi Saitual District Bawrhsap Pu C.Lalpeksanga'n  a kaihruai a. Khuallian lawmna leh thuhmahruai Pu P.C. Lalduhthlanga, S.P., Saitual District hnen atangin ngaihthlak a ni leh a. Pu Zonunthara, President, Saitual Town Joint VIllage Coucil chuan lawmthu sawiin hun a khar a ni. Govt. Saitual College(GSC) pawhin Governor pual hian GSC Auditorium-ah  programme an  buatsaih a. He hun hi Principal Dr.Lalsiamhnuna'n a kaihruai a.  Programme neih zawhah Governor chuan  GSC Gym, NIELIT Study Centre, Library, Faculty Room leh Class Room  te a tlawh kual nghal a. GSC hi 1984 Kum, May 28 khan din a ni a. Tun dinhmunah zirlai 470, zirtirtu 29 leh office staff 16 an awm mek a ni.