Vawiin chawhma khan Government J. Buana College Lungleiah Association for Voluntary Blood Donation (AVBD) Lunglei leh NSS Government J Buana College te tangkawp buatsaihin Valentine’s Day pualin a duh apiang te tan  thisen pek run pui (Blood Donation Camp) neih a ni. Blood Donation Camp thupui hi Show Love, Give Blood- Thisen pe in, I hmangaihna lan tir rawh, tih a ni. 

Blood Donation Camp hawnna hun Pu Lalrotluanga, Executive Mmber, AVBD Lunglei in kaihhruaiah Lunglei Medical Superintendent leh Lunglei AVBD President ni bawk Dr SR Ngurchamliana chuan thu sawiin sum leh pai seng lova mite tanpui theihna hlu ber chu a thlawna thisen pek hi a ni tiin Mizoram hmun hrang hrang ah YMA, Zirna in, kohhran hrang hrang leh pawl dangte hmalknain a thlawna thisen pek kan uar hi a lawmawm takzet a ni, a ti a. January ni 1, 1998 khan Supreme Court of India chuan thisen lei leh hralh a khap thu tarlangin Mizoramah phei chuan a sawngbawlna (processing) fee lak thin pawh nikum January atang khan sawrkar hmalaknain sawrkar damdawiin ah te chuan lak a nih tawh loh thu a tarlang a. Kan taksa a hrisel that phawt chuan thisen pek hi taksa tan a tha a, a hlauhawm lo a ni tiin zirlai kalkhawmte chu an hriselna enkawl uluk tur leh thisen pek uar turin a chah a ni. 

Prof J Zorema, Principal Govt J Buana College chuan thusawiin AVBD leh NSS Govt J Buana College ten Valentine’s Day puala thisen pek runpui programme tha tak an buatsaih avangin lawmthu a sawi a. Thisen pek hi mizo tlawmngaihna dik tak a ni a, A mizo in  kristian bawk  a ni tiin thisen kan mamawh aia tam kan neih hi ui lovin midangte i pe ang u a ti a. Kalkhawmte chu a thlawna thisen pek uar deuh deuh tur leh mahni pek mai duhtawk lova midang te pawh thisen pek hlutna zirtirtu leh kawhhmuhtu ni theuh turin a chah bawk a ni.

AVBD Lunglei hi 19^th October, 2001 din a ni a, Lunglei ah Blood Bank pahnih Civil Hospital leh Christian Hospital Serkawn ah awmin zirlai, YMA leh pawl hrang hrang thahnemngaihna avangin damlo ten thisen an dawng thin. 

Thisen pek hun lai hian hun hlim awm tak zai thiam, lam thiam, te bakah Cultural dance te neih a hun hman a ni. Blood Donation Camp-ah hian AVBD Lunglei hruaitute, media mi te, zirlai leh zirtirtu mi thahnem tak an kalkhawm a ni. 

Vawiin Blood Donation Drive ah hian mi 130 (mipa - 92, hmeichhia 38) ten thisen an pe a ni.