Zo Kutpui hmanga Manipur a kal Chief Minister Pu Zoramthanga chuan tukin khan Manipur Chief Minister Pu N. Biren Singh chu a chenna inah hmu in Mizoram leh Manipur hmasawnna leh remna leh muanna awm theihna tura hmalak chungchang an sawi dun.

Chief Minister pahnih te hian Manipura helna tihreh a tul takzet thu sawiin, Pu Zoramthanga chuan amah pawh sorkar laipui hotuten an beisei anga hmalak a tum dan Manipur Chief Minister hi a hrilh a. Pu N. Biren Singh chuan lawmawm tiin tan la zel turin a sawm ve bawk a ni. Mizoram CM chuan Manipur luh phalna ILP chungchangah zo mite chungah harsatna siamlo turin Manipur CM chu ngen a, hnam ziarang leh nihna vawn nun a pawimawh thu leh, chumi rual chuan hnam hrang leh tawng hrang hmangte karah inlaichinna tha a awm a pawimawh thu an sawidun a.

State pahnih economy hmasawnna chungchang sawi dun bawkin, inkalpawhna tha siam leh helicopter leh bus service lama hmalak theih sawi dun a ni bawk.

Mizoram Chief Minister hian vawiin chawhnu khan Aizawl a lo thleng leh a ni.