Pu H.Rohluna, Minister i/c Trade & Commerce chuan Ni 9.10.2014 khan Khawbung tlangdung tlawhin hemi ni tlai lam hian Vaphai bul, Tiau lui kama Saikhumphai a Border Trade Centre sakna hmun tur ah kalin hnathawh kal lai mek a enfiah.

Minister hi Vaphai khawtlang in ropui takin an lo hmuak a, amah lo lawmtute hmaah thu sawiin Pu H.Rohluna chuan,Vaphai khua chu Border Trade neihna hmun tur Saikhumphai kianga awm an nih avangin khaw vannei tak an ni tih a sawi a,Helai hmuna Boder Trade neihna turah hian Detailed Project Report pawh Central Sorkar ah thehluh vek a ni tawha, hemi atan hian Cheng Nuai 800 dil a ni a,Saikhumphai ang bawk hian Farkawn leh Sangau hmunah Myanmar nena insumdawn tawnna tur Centre siam tum a nih avangin kan sum neih tur Rs.Nuai 800 hi heng hmun atan te hian insem a, siam rem a ngai a ni a ti.

Tunlaia Mizoramin Oil leh thil danga harsatna kan tawh mek chungchanga sorkar hmalakna sawiin Pu H.Rohluna chuan eirawngbawlna Gas leh Oil lama harsatna kan tawh mekte sukiang turin sorkarin hma a la mek a, sorkarin tan a lak mek rual hian sorkar chu amah ngawtin mipui tawiawmna tel lovin a kal thei lova,chuvangin mipuiten sorkar kan tawiawm ve a tul a ni a ti.

Mizoramah Gas a awm a ni tih hriat a nih avangin mi pawimawh hrang hrang Delhi ah biak a ni tawh a, ahmun ngeia min rawn hmuh puia an zirchian vek hnuah heng kan ram thil hlute hi hman theih thuai a nih a beisei thu a sawi bawk.

Tunah hian Maubuangah Metre 4500 lei verh turah Metre 1000 an verh tawh a, tluangtea a kal chuan kan ram leilung hausakna hi reiloteah chhawr theih thuai a nih a beisei thu a sawi.

Zirna lama Mizoten tan lak a tul zia sawiin Education Minister ni bawk Pu H.Rohluna chuan Zirna lamah India ah 2-na ni thin chu tunah 3-na kan ni ta a, hei hi kan tlakhniam tak vang ni lovin kan aia thiam tam zawk an awm vang a ni a, zirna lamah hmasawn a ngaih rualin zirtirtu thahnemngaihna chauh a tawk lova, zirlaiten zirtirtute thahnemngaihna an zawm a tul a ni a ti.A sawi zelnaah Minister chuan Bialtu MLA te hriatpuina lo chuan zirtirtu tumah transfer loh tur a ni a ti a, Mizoram hmun hrang hranga zirtirtu awmdan inkhai rual lo lutuk, hmun thenkhata awm tam, thenkhata tlem lutuk chu siam rem turin sorkarin hma a la mek a ni a ti bawk.Minister hi Bialtu MLA Pu T.Sangkunga leh Education Department hotuten an tawiawm a ni