Ni 10.10.2014 khan Farkawn-a Zofate Run ah Mizo Zirlai Pawl (MZP) khawmpui lian (Assembly) a hmanpui.

He zirlai pawl khawmpuiah hian thu sawiin Pu H.Rohluna School Education Minister chuan Zirlaite hi hnam tana chi (seeds) an ni a, thlai tha chi tha chu a rah pawh a tha ang bawk hian zirlai tha chuan khua leh tui tha an rawn hring chhuak a ni tih sawiin he huna kalkhawm zirlaite chu chi tha (good seeds) ni turin a sawm.

Kan ram mamawh, nakin lawka kan ram hruaitu turte chu tuna zirlaite hi in ni a, kum a lo upat tawh hnuah zirna kalpui a harsa tih tarlangin tun hun a an hun tha chu hmang tangkai tura fuihin Khawvel hi a thei apiang te din channa (survival of the fittest) a nih avangin mahni kalna zawn theuh ah hlawhtling ngei tura tan la turin a fuih a, Mizoram chhung chauh ni lo, India ram leh khawvel ram dangah te zirlaite an in zarpharh a tul a, nakina Mizoram hnar kaitu ni thei tura tun atanga an lo inpuahchah lawk a tul a ni a ti.

A sawi zelnaah Pu H.Rohluna chuan zirlaite chu an mahni hmazawm theuhah thahnem ngai lehzual tura fuih in an mahni chhungkua bakah kan ram leh hnam tana chhenfakawm ni thei ngei tura zirna uar turin a fuih a, Exam-a pass ngawt duh tawk lovin, mahni kalna zawn theuh ah mi thiam (master) nih tum tura chahin a bikin Mipa ten tan an lak thar a tul a ni a ti a,kan ram leilung fate ni lo chuan mi an hawsan hun te a thlen thin avangin Mizo fate ngeiin he ram kaihhruaina hna hi a tam thei ang ber kan thawh a ngai a ni a ti bawk.