DIRECTORATE OF INFORMATION & PUBLIC RELATIONS, Government of Mizoram, India

317/2024-2025

Champhai, the 19th April, 2024: Inpuahchahna leh ruahmannate tha taka hlenchhuah a nih hnuah Lok Sabha Inthlanpui, 2024 hnuaia Champhai District-a vote thlak chu boruak muanawm tak hnuaiah harsatna lian tham awm lovin felfai taka zawhfel a ni a, tlai dar 5:00 a Champhai District-a vote tla zat chu 56.39 % a ni.

District Election Officer Pu James Lalrinchhana chuan vawiin chawhnu khan Champhai khawpui chhung leh a chhehvela Polling Station thenkhatte tlawhin vote thlak boruak a thlithlai a. MPF leh Scouts & Guides duty-te kawmin inthlanna muanawm felfai leh langtlang tak buatsaih kawnga an hmalakna chhuanawm a tih thu a hrilh a. Polling personnel, security personnel, BLO leh polling agent-te pawh tlawhin an hmalakna fakawm a tih thu a sawi a. Boruak muanawm tak hnuaia harsatna lian tham awm lova vote thlak zawh fel a nih theih nana hmalatu leh vote thlak zawng zawngte chungah lawmthu a sawi a ni.

Champhai District-ah chuan zing dar 7:00 hmain Mock Poll zawhfel vek niin, zing dar 7:00 atangin vote thlak tan a ni a. Polling Station 84 zinga 50 (60%) ahte hlawhtling taka webcasting tih niin chetvelnate District Control Room, DC Conference Hall atangin uluk taka vil a ni a, darkar hnih dan zelah vote tlak dan kimchang lakkhawm niin report pek thin a ni a. Vote thlak hnuah 25/28 Farkawn -I Polling Station-a EVM khawl a chian loh avangin a set pumpuia thlak a ni a; hemi hnu hian tluang taka vote thlak chhunzawm a ni. Hun tiam chhunga vote thlak hman lo, line-a intlar an awm lova, tluang takin tlai dar 5:00 ah khan vote thlak hi khar fel a ni. Champhai District chhunga Polling Station 84 zinga vote tlak thatna ber Polling Station chu 23/21 Keifangtlang Polling Station a ni a, vote 83 a tla a, hei hi za zela 106.41% niin pawn lam mi election duty vote thlak an awm tam vang a ni. Vote tlak chhiatna ber Polling Station chu 24/14 Tlangsam-I Polling Station niin, vote 353 tlain hei hi za zela 40.11% a ni.

Champhai District chhunga Assembly Segment 3 hnuaia vote tlak dan chu hetiang hi a ni:-

23- CHAMPHAI NORTH				24-CHAMPHAI SOUTH				25-EAST TUIPUI
MALE	FEMALE	TOTAL	%	MALE	FEMALE	TOTAL	%	MALE	FEMALE	TOTAL	%
5589	5588	11177	55.56	5772	6182	11954	55.49	4900	4373	9273	58.68

CHAMPHAI DISTRICT CHHUNGA VOTE AWM ZAT (SERVICE VOTER TEL LOVIN)				CHAMPHAI DISTRICT VOTE TLAK DAN
AC	MALE	FEMALE	TOTAL	MALE	FEMALE	TOTAL
23	9760	10357	20117	16261	16143	32404
24	10279	11264	21543	58.03 %	54.83 %	56.39%
25	7983	7983	15803