2929/2023-2024

Aizawl, the 4th December, 2023: General Election to the Mizoram Legislative Assembly, 2023 atan tukin dar 8:00 atang hian Mizoram chhunga District 11 huamchhunga Assembly Constituency 40 a vote tlate boruak muanawm tak hnuaiah chhiar tan a ni.

Vote chhiar tan hma hian vote chhiar tur Counting Official-te chu an chanpual tur hrilh lawk an ni lova, zing dar 5:00 khan 3rd Randomisation hmangin pawhfel a ni. Venhimna khauh tak hnuaiah vote tlakna EVM/Postal Ballot dah thatna Strong Room-te hawn niin EVM te Counting Hall-ah lakluh a ni a. Vote chhiar hi zing dar 8:00 atangin Postal Ballot chhiara bultan a ni a, darkar chanve hnuah EVM a vote tlate chhiar chhunzawm tur a ni ang.

Mizoram pumah vote chhiar buaipui tur hian Returning Officer, Assistant Returning Officer, Counting Supervisor, Counting Assistant, Micro-Observer leh hna pawimawh dang hrang hrang thawktu mi 2,780 vel an awm a. Polling Station tina Presiding Officer 1,276 te chu vote chhiarnaah hian awm bawkin Security mi leh sa ten Counting Centre tinah thuah thumin venhim hna an thawk bawk.

Counting Centre 13 ah Assembly Constituency tin tan Counting Hall pakhat zel awmin a vaiin Counting Hall 40 a awm a. Heng Counting Hall-ah hian Counting Table 396 awmin vote chhiarna dawhkan tinah hian Counting Supervisor pakhat, Counting Assistant pakhat leh Micro-Observer pakhat zel an awm a, vote chhiarna hmun hi ECI ruat Observer 40 ten AC tinah a malin an vil mek a ni. Counting Table awm zat leh vote chhiar tur Polling Station awm zat hian chhiar hun (round) pawh hi a hril dawn avangin Round 5 a chhiar zawh tur AC 7 a awm a, Round 4 awmna AC 12, Round 3 awmna AC 18 leh Round 2 a chhiar zawh tur AC 3 a awm a. EVM (Control Unit) a vote tla chhiar zawh vek hnu hian AC tina Polling Station 5 a VVPAT a vote tla (paper slip) te chu EVM (Control Unit) a vote tla nen a inmil em tih finfiah zel a ni ang.

General Election to the Mizoram Legislative Assembly, 2023 vote chhiar trends/result-te hi www.results.eci.gov.in leh Voter Helpline App (Android/IOS) atangtein a ngaihven reng theih a ni.