Nimin (11.2.2015) a Shillong a neih zawh tak Brahmaputra Board High Powered Review Meeting-a Chief Minister aiawha tel Minor Irrigation Minister Pu Lal Thanzara chuan Flood Management Programme (FMP) hnuaia Mizoram hmun hrang hranga leimin laka invenna leh leimin in a tihchhiat siamthat lehna project kalpui mekte chak zawka hma lak a nih theihna tur te, ei leh bara intodelhna kawnga awmze nei zawka kan ram lui leh ruahtui chhawr tangkaina chungchang te, sawrkar laipui project-a state share 30% atanga 10% a tih tlem chungchang te leh Minor Irrigation leh Soil & Water Conservation hnuaia project hrang hrang kalpui dan tur chungchangte he Board Meeting-ah hian a thlen.

He Review Board Meeting hi Union Minister for Water Resources Pi Uma Bharti kaihhruaina hnuaia neih a ni a. Union Minister of State for Home Affairs Kiren Rijiju, Meghalaya Chief Minister Dr. Mukul Sangma leh hmarchhak state Chief Minister hrang hrang aiawh te an tel.

Union Minister Pi Uma Bharti chuan kum 35 zeta upa Brahmaputra Board chu a hming thlaka a kalphung pawh NE state te tana awmze nei zawk tura her danglam a nih tur thu a puang a. North East Brahmaputra River Rejuvenation Authority (NEBRRA) tia hming thlak rawtna leh a kalphung tur ruahman chhinna te chu sawi ho nghal a ni a. Uluk zawk a zir chianga rawtna mumal thlen turin state tinte beisei an ni.

Brahmaputra Board hi Ministry of Water Resources hnuaia The Brahmaputra Board Act kaltlanga din leh mahni inrelbawlna hran nei thei tura thuneihna pek a ni a. Hmarchhak state hrang hrang te huamin hmarchhak state Chief Minister te chu High Powered Review Board ah hian member an ni.