Vawiin khan Kolasib DC Conference Hall ah Tripura Bru Relief Camp 6 atanga Kolasib District a Bru Chhungkaw 824 hruai kir dan tur ngaituahin Pi Lalbiaksangi, Jt.Secretary, Home Department hoin an thukhawm.

Sawrkar laipui, Mizoram Sawrkar, Tripura Sawrkar leh Mizoram Bru Displaced Peoples Forum te chuan Draft Agreement an siam angin August ni 16, 2018 atanga Septmeber ni 30, 2018 chhungin Tripura Relief Camp 6 atangin Bru chhungkaw 5407 (mi 32,876) laklet tur an ni a , hengte hi Mizoram a District Pathum Lunglei, Kolasib leh Mamit ah sem darh tur an ni a, Mizoram an rawn luh ni hian Staging area ah zan khat an awm lailawk anga, hemi chhung hian ei leh in, tui in tur, inthiarna leh Medical facilities pek tur an ni a, a tuk ah an chen na tur hmun hrang hrang an pan anga, hemi hmunah hian an chen lailawk na tur sak sak an ni anga, Sawrkar atanga insak tanpuina 1,50,000/- an dawn tur chu Direct Benefit Transfer (DBT) kaltlangin chhawng thuma pek tur an ni a, an rawn let tirh in chhungkaw tin chu cheng 25,000/- theuh pek an ni anga, an chenna tur in chu za a sawmnga an sak zawh hunah  (50% completion of House Construction) cheng 50,000/- pek an ni anga, in an sak zawh hunah cheng 75,000/- theuh pek leh an ni ang.

Bru chhungkua rawn let te hi Mizorama an rawn let thla ah One time Financial Assistance cheng nuai 4 chu chhungkaw lu ber hmingin Fixed Deposit in kum 2 chhung dah ani anga, Mizoram a kum 3 an chen hnuah pekchhuah chauh tur an ni. Hemi bakah hian kum 2 chhung a tan thlatin cheng 5000/- tanpuina pek an ni ang (DBT kaltlangin) ,Ration chu kum 2 chhung a tan a thlawna pek an ni bawk ang, Mizoram Sawrkar hmalaknain hruaikir tur an ni anga, a hruaikirna senso (cost of transportation) hi Ministry of Home Affairs in Mizoram Sawrkar hnenah a pe dawn a ni.

Hruaikir hna thawk tur hian LO leh AO engemaw zat ruat an ni a August chawlhkar khatna ah briefing pek an ni ang, Bru chhungkaw laklet tur te hi vote an neihna hnaih ber khua a dah tur an ni a.  Kolasib District ah hian Bru chhungkaw 824 hruaikir tur niin ; Kaskau camp atangin chhungkaw 30, Khakchangpara camp atangin chhungkaw 14, Hamsapara Camp atangin chhungkaw 8, Asapara camp atangin chhungkaw 391, Naisingpara Camp atangin chhungkaw 323 leh Hazacherra camp atangn chhungkaw 58 an ni.