North Eastern Council (NEC) Meeting vawi 67-na chu vawiin khan Shillong State Convention Centre-ah neih a ni a. He meeting hi Union Home Minister Pu Rajnath Singh chuan a kaihruai a; Union Minister of State for DoNER Dr. Jitendra Singh leh India Hmarchhak state Governor leh Chief Minister-te kalkhawmin, Mizoram Governor Pu Kummanam Rajasekharan leh Chief Minister Pu Lal Thanhawla te pawh he meeting pawimawh ah hian an tel a ni. Meeting hi naktuk (10.7.2018) thleng neih a ni ang.

Governor Kummanam Rajasekharan chuan North Eastern Council tihchak zel a tul thu leh, tunhnaia NEC chu hmasawnna schme hrang hrang kalpui bakah buaina chinfel kawngah te, development planning lamah leh thiamna hmunpui, ‘knowledge hub’ atana council a ruat a ni tel chuan chak zawka hmasawnna a thlen phah ngei a beisei thu a sawi a. India hmarchhak a awmze nei zawka hnathawk thei tura sum leh pai leh thawkty tha a thuam a pawimawh thu sawiin, Union Home Minister kaihhruaina hnuaiah mumal zawk leh chak zawka NEC a kal theih a beisei thu a sawi.

Chief Minister Pu Lal Thanhawla chuan NEC Meeting-a a thusawi naah NEC chu dinhmun pawimawh zawk leh chak zawka dah a tul thu leh, India Hmarchhak state te chu “new growth centre” a siam tur chuan sum tih tham zawk leh hnathawktu tha zawk an mamawh thu a sawi a. Kum 2017-18 atanga 2019-20 chhunga India hmarchhak state zawng zawng tan Rs.4500 crore NEC Scheme atana dah chuan project kalpui mek te a huam tel avangin hemi hun chhung hian project thar hlak siamna tur a daih dawnloh avangin NEC a sum dah zat chu tihpun ngei a duh thu a thlen a. NEC in Mizoram New Economic Development Policy chu tha a tih avanga State dang zawng zawng hetiang ang duang ve tura a ti chu lawmawm a tih thu a sawi bawk. Chief Minister chuan Act East Policy a taka chantir tur chuan North East state-te policy duanna leh a taka thawhna turah an tel ngei ngai a tih thu sawiin, Act East hlawhtlinna tur chuan India hmarchhak state-te a development policy kalpui hmasak a tul thu sawiin, a bik takin inkalpawhna kawng tha siam a pawimawh hmasak thu a thlen bawk.

Tun tum NEC Meeting-ah hian thu pawimawh tak tak an ngaihtuah zingah March 2020 thlenga NEC scheme kalpui chhunzawm chungchang te, NEC inkaihhruaina thenkhat ennawn te, Aspirational District 14 a hmalakna te, kum 2011 a kuthnathawktute sum lakluh a let a tipung tura hmalakna chungchang leh thu pawimawh dang a tel a ni.

NEC Plenary-ah hian North East State a Chief Secretary te leh Planning Secretary te an tel hlawm a. Mizoram atang pawhin Planning Secretary Dr.C. Vanlalramsanga leh official dang an tel a ni.

NEC hi kum 1971 khan din niin, India hmarchhak state – Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura te tihmasawn tura nodal agency a ni a. North East Region tan chuan tun tum NEC Meeting hi Statutory Regional Planning Body anga thutkhawm vawi 18-na a ni tel a ni. Union Cabinet chuan thla hmasa khan Union Home Minister chu NEC Ex-Officio Chairman ah ruat in, Minister for Development of North Eastern Region (DoNER) chu vice-chairman in dah a ni bawk.