Nikuma Sawrkar leh All NGO thu inremna angin a tawp nan Sawrkar chuan Tripura refugee Camp a awm mek te laklet dan tur ngaituahin vawiin thutkhawmna hmasa chu Kolasib DC Conference hall ah Bawrhsap Pu Zoengsanga kaihhruaina hnuaiah neih a ni.

He hunah hian Mizoram Sawrkara Home Department Addl Secretary Pi Lalbiaksangi chuan nikuma Sawrkar in All NGO te hnena a lo intiam angin tun tuma Bru laklet tum hi a tawpna tur a nih tih a tarlang a, hemi a tan hian tun tuma list an neih te chu 2018 ami ani a, mi thenkhat ‘OTHERS’ tih a dah chhungkaw inlaichinna zirchian ngai te pawh an awm a, list ennawn bakah heng ho endik leh tur hian 2nd Phase identification chu neih leh phawt a ngai dawn ani tiin Bru laklet tur te chu inkaihhruaina (guideline) bu in a phut angin an chhuahsan na ngei Assembly Constituency ah dah let tur anni a, hemi kawnga hma la tu tur Official te chu fimkhur leh uluk taka mahni hna hlenchhuak turin a chah ani.

He hunah hian Kolasib District a Bru ho let na tur khua a VCP te chuan an harsatna tawh dan hrang hrangte report an pe a, kawng awlsam zawk leh felfai zawk tura an ngaih chungchangah te pawh rawtna an thlen a ni. Bru ho dah na tur khaw sawm zinga khaw panga heng Bukvannei, Meidum, Pangbalkawn, North thinglian leh Saihapui (k) a Bru ho awmna tur hmun chuan Forest plantation a khawih buai/ nek chep dawn avangin thuneitu sang zawk hnena thlen a ngaih thu tarlan a ni a, rastali khua a chhungkaw 79 dah na tur hmun ruahman chu mimal ram anga chhal an nih hlawm avangin endik that leh vek a ngaih tur thu tarlan bawk a ni.

Kolasib District a Bru lak let tur te hi khaw sawm (10) a dah tur an ni a, Dilzau ah chhungkaw 55, Saihapui (k) ah chhungkaw 57, N.Thinglian ah chhungkaw 157, Hortoki ah chhungkaw 131, Pangbalkawn ah chhungkaw 45, bairabi (zophai) ah chhungkaw 54, Bukvannei ah chhungkaw 45, Meidum ah chhungkaw 45, South Chhimluang ah chhungkaw 154, Zodin (rastali) ah chhungkaw 79 niin, Kolasib District a Bru chhungkaw lak let tur hi an vaiin chhungkaw 822 an ni a. Tun dinhmunah nikum a khakchangpara leh hamsapara camp atanga laklet chhungkaw pahnih  Pu Lalnunfela te chhungkua leh Pu Hriata te chhungkua chu  meidum leh rastali khua ah an cheng mek a ni.

Mizoram Sawrkara Home Department OSD Pu David H Lalthangliana chuan Bru laklet chungchangah hian Sawrkar chu amah maiin a che thei dawnloa VCP te bakah khawtlang hruaitute leh mipui tanpuina an mamawh dawn tih sawiin thawhpuiah kalkhawm khawtlang hruaitute chu a sawm a, hmalakna tur kawng hrang hrang ah harsatna an nei emaw thu zawhfiah duh leh hriatchian duh an neih chuan Home Department thu neitu te chu an inhawng reng ani tih a tarlang bawk.

He hunah hian Bru laklet tur kaihhnawiha din District Level Consultative Committee member te an kalkhawm a, Home Department hotute hian Mamit leh Lunglei ah te kalin Meeting an neihpui leh anga, heng thutkhawmna a thurel atang te hian Bru laklet dan tur ruahmanna chipchiar (Movement plan) chu State level ah sawihona an nei leh dawn a ni.