Vawiin khan Mamit District Hospital OPD Building-ah karhnih chhung awh tur  Intensified Diarrhoea Control Fortnight chu Pu Jacob Lalawmpuia, Addl.DC Mamit chuan a hawng.

Pu Jacob Lalawmpuia, Addl.DC chuan hawnna thu sawiin Mamit chu India rama District hnufual dawmkan ngai 116 zingah a tel a. Hnam hnuaihnung zawkte tamna District kan nih avangin duh anga hmasawn zung zung a la harsat thu sawiin Health Sector chu Aspirational District atanga chhuahna, Aspirational District nih lohna tura a ki pawimawh ber leh Mark pawh pu sang ber anih avangin thawktute pawh nasa lehzuala tan la turin a fuih a. Thingtlang kilkhawr zawka thawkte phei chu tih tur anih anga tisatliah ngawt lovin inpekna tak tak nena thawk turin a chah bawk.

Kawthalo chu naupang kum 5 hnuailam thihna thlentu lian ber a ni a. India ramah kumtin kawthalo avangin naupang kum 5 hnuailam Nuaih chuang an thi thin a ni a ti. Kawthalo hri dona beihpui chu karhnih chhung hman tur nimahse kumtluana tireh tura kan beih a ngai a. Sik leh sa inthlak danglam vang leh ei leh in fimkhur tawk loh avangin kawthalo natna tam tak hi a thleng thin a. Ei leh in fimkhur tur leh kut fai taka sil thin a pawimawh thu a sawi bawk.

Dr. Vanlalfela, Chief Medical Officer (CMO) Mamit pawhin thu sawiin Kawthalo chu Mizoram mai ni lo India ram ang pawhin a tam hle a. Hemi Control tur hian theihtawpchhuah niin tuna Fortnight chu a beihpuithlakna atana bultanna anih thu a sawi a. He beihpuithlak chhung hian Damdawi In hrang hrang, PHC leh Sub-Centre-ah te ORS leh Zinc Corner a mamawhtute lam mai theiha dah anih dawn thu leh naupang kum 5 hnuailam awmna in tinah ASHA-te'n kawthalo damdawi an sem dawn thu leh Kawthalo thlentirtu chu chi hrang hrang a awm theih avangin midang damdawi ei ang ei ve mai lova mithiamte rawn hmasa thin turin kalkhawmte a chah bawk.

He hun hi Dr. Lalrinfela.H, Medical Officer, District Hospital Mamit-in a kaihruai a. Kalkhawmte hi kut sil dan demonstration zirtirna neihpui niin kalkhawm zawng zawngte hnenah hian ORS pek vek an ni.