Bru raltlante laklet hna thawh meka Lunglei District chhunga Bru-te awmna tur Lunglei khawthlanglama Buknuam khua chu vawiin khan Lunglei DC Pi K. Lalrinzuali chuan tlawhin inbuatsaihna hrang hrang a enfiah.

Lunglei DC hi Buknuam khawtlangin lo hmuakin ropui takin an lo dawngsawng a, khawtlang hruaitute nen inkawm hona nei nghalin Pi K. Lalrinzuali chuan tuna Bru lo haw Lunglei District rawn pan mekte chu chhungkaw paruk, puitling 19 leh naupang 9 an vaiin mi 28 kawng lakah an thang mek thu sawiin puih an ngaihna zawnah puibawm a thlamuang taka an awm theihna tura a tul anga lo bawihsawm turin khawtlang hruaitute chu a ngen a, Bru lo haw mekte tan sawrkar pawhin kawng hrang  hrang a ruahmanna tha zawk a siam zel thu leh kawng leh eng tha zawk an hmuh theihna tur pawha chak taka hma a lak chhunzawm zel thu a sawi bawk a ni.

Lunglei SDPO Pu K. Vanlalrochana pawhin venhimna chung changa an hmalakna sawiin Buknuam khua chuan dan leh thupek chung changah harsatna an neih pawha a rang thei ang bera Police te hriattir tur leh an buainate a rang thei angbera chinfel sak an inhuam reng thu a sawi bawk a ni.

Buknuam khawtlang hruaitute chuan Lunglei DC hnenah hian khawtlang anga harsatna an neih leh an duh leh mamawhte an lo thlen a, lawmthu sawiin Buknuam khua kum 50 zeta upa tawh chu Bawrhsapin a vawikhat tlawhna a nih thu an sawi bawk a ni. Lunglei DC hian Bru raltlan lo let mekte awmna tur hmun hi tlawhin a tul anga tih phuisui zel tum a nih thu a sawi bawk.