Champhai District Badminton Association (CDBA) leh Mizoram Badminton Association (MBA) tangkawp buatsaih Badminton inelna lian Champhai Open 2019 chu vawiin khan a hmawr bawk a ni ta. Kharna hun hi Dr ZR Thiamsanga Champhai North bialtu MLA leh Vice Chairman Health & Family Welfare Board ni bawk chuan khuallian niin a hmanpui a ni. Badminton thiam rualte inelna MBA Official Ranking Categories leh CDBA Non Ranking Category huanga inelna hi October Ni 1 atanga Ni 4, 2019 chhungin Champhai Town Hall-ah khelh a ni.
Khuallian chuan infiamna chu taksa leh rilru hrisel siamtu ruihhlo leh a kaihhnawih laka thalaite venghimtu leh chhantu pawimawh tak a ni, a ti a. infiamna huangah Mizo thalaiten khawvel dengchhuak turin theihna nasa taka an neih thu leh infiamna chu eizawnna tlak anih mai piah lamah nun hrisel siamtu a ni, a ti a. Taksa sawizawi leh infiamna hmangin natna hrang hrang a pumpelh theih thu a sawi a. Infiammi te chu rilru zau tak leh mahni inthunun thei tak an nih thu leh rilru zau tak nei an ni, a ti bawk.
Vawiin Champhai Open 2019 kharna hun hi Pu H.Rothangliana, SR. Vice President & Organizing Chairman chuan a kaihruai a. Khuallianin 'Badminton Dan Bu ziahna Mizo tawnga lehlin Pu Paul Zakhuma, Gen Secretary & Organizing Secretary siam a tlangzarh a.
Champhai Open 2019 a tel tur hian Mizoram hmun hrang hrang atangin Badminton Player thiam rual 226 an fuankhawm a, MBA Official Ranking Categories; Men’s Singles-ah Samuel Lalnunmawia, Mizoram Police Badminton Club champion-in Lalmuanawma, Mizoram Police Badminton Club chu pahnihna a ni a.
Women’s Singles-ah F.Lalnunzami, Chhinga Veng Badminton Club chu champion-in Lalrinzuali, Ralte Villa Badminton Club chu pahnihna a ni a. Heng bakah hian Men’s Doubles, Women’s Doubles leh Mixed Doubles inelnate neih anih bakah CDBA Non Ranking Categories-ah kum bithliah huang inlena neih ani bawk.
