Bru raltlan te lak kir  thawh thumna (3rd Movement of 3rd Phase) hna kalpui mekah ah nimin khan Narsingpara Refugee Camp atangin Bru chhungkua 24 lak kir (repatriate) an ni a. Heng zing atang hian Khanthuam ah chhungkua 6 (puitling 15 leh naupang 5); Tuipuibari ah chhungkaw 4 (puitling 18 leh naupang 5); West Bunghmun ah chhungkua 6 (puitling 23 leh naupang 12)  leh Damparengpui ah chhungkua 8 (puitling 39 leh naupang 8) dah tura ruahman an ni a. Tun tuma Bru raltlan rawn kir hi puitling  95 leh naupang  30 an ni. Khanthuam leh Bunghmun a chhungkua awm tur te hi Kanhmun a Facilitation Centre ah an lehkha neihte endik an ni a, Tuipuibari leh Damparengpui a chhungkua awm tur te hi Tuipuibari a Facilitation Centre endik sak an ni bawk.

Bru lo kir tur (repatriation process) hi Central Sawrkar-in  an rawn ruahman angin Mizoram Sawrkar leh Tripura Sawrkar in an kalpui a ni. Tun tuma ruahmanna siam chhan chhungkua 123 lo kir tura beisei a ni lai in chhungkua 24 chiah an kir duh a ni.  Bru chhungkaw haw tur beisei zat an lo haw loh chhan hi anmahni sawi danin Lo vah hun a pelh tawh vang leh Lo an neih loh chuan ei leh barah harsatna tawh an hlauh vang niin an sawi.

Bru lak kir hna hi Narsingpara ah Pu Benjamina SDO (Civil) Kawrthah leh Pu Mark Lalthanliana, BDO Reiek te chuan a hmuna kalin an buaipui a; an ni bakah hian Narsingpara Camp-ah leh Tuipuibari ah I & PR officer Pu Robert Thangmawia, IPRO, Pu Pratap Chhetri, IPRO leh Camera team te an kal bawk a ni. Tripura lam atangin Pu A B Chakma, SDM Kanchanpur, Kailashar District administration thuneitute dangte leh Tripura Police ten an ni hi an lo tawiawm a ni.