Kolasib MZP leh MSU hruaitute chuan vawiin khan Kolasib DC Pu R. Lalramnghakan Tripura-a tuikuk raltlan an camp-a vote thlak tir tur chungchang sawipui tura a koh angin a office chamber-ah hian an inkawm a. DC chuan tuikuk ral tlan Tripura a awm te vote thlaktir tura hmalakna hi Election Commission of India duhdan leh ti tura a tih anga anmahni Camp-a venhimna tha tak hnuaia vote thlak tir an nih dawn thu MZP leh MSU hruaitu te hi alo hrilh a. Sawrkar ruahmanna kalh zawng leh buaina chawk chhuak zawng a chelo turin a ngen a ni.

MZP leh MSU te hian tuikuk te vote thlaktir tura sawrkar hmalakna hi dovin a tul anga hma lakzui an tum thu an lo sawi tawh a. Hei vang hian Kolasib DC chuan lengah sawmin vawiin khan a sawipui a. Bru te hi India khua leh tui an nih avang leh India danpui hnuaiah democratic right hmanga vote thlak chu an chanvo liau liau a nih avangin ECI chuan a ngai pawimawh hle a ni, a ti a. Hearing pawh uluk taka neih a niin mi 400 chuang dilna lut atangin tun tumah hian voter 48 thunthar a ni, Pu Ramnghaka chuan a ti a. Constitution in right min pek ang hi khua leh tuite chuan kan ti hlawhtling ngei tur a ni, tih hi ECI ngaihdan a ni, a ti a ni.

Ruahman ang chuan Tripura-a tuikuk ral tlan te hi karleh November 19 & 20 khian Vote thlaktir an ni dawn a. Kolasib atangin ARO pahnih Pu Lalrinawma, MCS, SDC leh Pu Vanlalruata, BDO, Thingdawl te pawh Tripura ah hian an kal dawn a. Venhimna uluk tak hnuaiah Bru te hi vote thlaktir tum a ni.