Vawiin chawhma dar 11 khan I&PR Auditorium Chanem Building ah 23-Champhai North (ST) leh 24-Champhai South (ST) A/c huamchhunga Booth Level Officer (BLO) te tan taining neih a ni.

He training ah hian Election Officer Pu R. Vanrengpuia chuan thusawiin, BLO tinte chu an hna ngaipawimawh turin a fuih a, inthlan kan hmachhawn tura mipui te thiamloh hrilhtu pawimawh tak an nih thu sawiin, midangte tanpui tura inpeih reng turin a fuih bawk a ni. Booth Level Officer te chu mipui, a tam thei ang berin vote an thlak theihna tura mi pawimawh an nih zia pawh tarlang bawkin, an hna thawh dan tur hrang hrang leh Election Commission of India in a phut ang taka thil ti theuh turin a fuih bawk a ni

He hunah hian Pu Alan Lalthanzara SDC pawhin Systematic Voters’ Education and Electoral Participation (SVEEP) chungchangah zirtirna a pe bawk a, Pu Alan-a chuan, Election Commission of India in a rawn duanchhuah a nih thu a sawi a, mipui, vote nei tawh zawng zawng ten vote an thlak theihna tura duan a nih thu tarlangin, BLO tinte chu mipuite hrilhhriat kawnga tanla turin a fuih bawk a ni. He hunah hian Pi Rochuangkimi Khenglawt SDC pawhin BLO te tih tur leh an dinhmunte a sawi a, inthlan huna darkar tina vote tla zat report dan turte a hrilh bawk a ni.

Vawiin training ah hian 23-Champhai North (ST) leh 24-Champhai South (ST) A/c huamchhunga Booth Level Officer te hnenah Voters Slip semchhuah a ni bawk a, 23-Champhai North (ST) ah hian BLO 29 awmin, 24-Champhai South (ST) A/c huamchhungah hian BLO 24 an awm bawk a ni.