Border Security Force (BSF) chuan an din champha phak kum 50-na ‘Golden Jubilee’ pualin vawiin khan rampuma BSF Battalion leh Border Outposts zawng zawng ten thing an phun a, hei hi a ruala thingphun tam ber record nih beiseiin Limca Book of Records-ah an hming chuantir an tum a ni. Lunglei-ah pawh vawiin khan 162 Bn BSF te chuan Lunglei hmun hrang hrang bakah an BOP awmna hmun zawng zawngah thing 1315 an phun.

Golden Jubilee thingphun hi 162 Bn BSF hmunpui Zotlang, Lunglei-ah hawnna neiin Lunglei DC Pu Ashish Madhaorao More pawhin a hmanpui a. DC Pu Ashish More bakah BSF Commandant Pu Ajith Kumar V. leh Dy. Commandant VJS Slaria ten thing phun hmasain vawiina Golden Jubilee lawmna an hawng a ni. Vawiina thingphun hi 10:00 AM-10:30 AM inkara phun zawh vek a ni a, darkar chanve chhung hian BSF mi 36-in an phun zo vek hman a ni.