No.3889/2021-2022
Aizawl the 3rd, February’ 2022 : Vawiin chawhma khan BSF Wife Welfare Association (BWWA) President, Mizoram & Cachar Frontiers BSF Smt. Pubali Sonowal, chuan Bethel Centre, Chhumliamkawn, Lunglei tlawhin Civic Action Programme 199 Bn BSF, Zotlang kaltlangin tanpuina a hlan. Smt Pubali Sonowal hi Smt. Menka Joisi, President, BWWA, 131Bn BSF, Melte leh Smt. Neharika, President, BWWA, 199 Bn BSF Zotlang ten an tawiawm a. Bethel Centre naupangte hnenah hian School Bag thahnem tak leh eitur an pe a ni.

Civic Action Programme hmanna inkhawm hi Major N.K. Saini, Dy. Commandant, 199Bn BSF in kaihhruai in Smt. Pubali Sonowal chuan thu sawiin mihring nunah hian harsat lai leh mangan lai te kan tawk thin a, midangte aia dinhmun chhe bik riauva in ngaihna te kan nei thin tiin kan dinhmun atang theuh hian kan hmalam hun kan thlir thiam a pawimawh a ni a ti. Bethel Centre a awm naupangte pawh an nun kawng zawh zel turah chhel tak leh taima taka ke pen zel turin a chah a. Bethel Centre a thawktute chu fakawm a tih thu sawiin harsatna leh mamawh an neih chuan BSF te hrilh hre tur leh an theihna zawnah tanpui an in huam reng thu a sawi bawk.

Pu Lalremruata Sailo, Bethel Centre Home Father pawhin thu sawiin BSF Wife Welfare Association ten tanpuina hlu tak an pek avangin lawmthu a sawi a, Bethel Centre hi kum 2003 a din niin tun dinhmun ah naupang 88 leh thawktu 13 an awm mek a, zirna in Primary leh Middle School an nei a ni.

BSF Wife Welfare Association chu kum 1992 a din niin midangte tana inpek leh tanpui ngaite tanpui chu a thil tum ber a ni a. Sipai nupuite leh hmeithai te hnenah training chi hrang hrang kut themthiam thil te, zirna te, hna zawn kawnga thil thar kawhhmuh te, hriselna te, hmathlir zau zawk neih te leh inchungkhur enkawl dan te zirtir thin an ni a.