No.3888/2021-2022
Aizawl 3rd February, 2022 : Vawiin khan DC Conference Hall, Mamit-ah Pu Lalnunhlua, District Bawrhsap hovin Mamit District chhunga Covid-19 hrileng mek dinhmun thlira thutkhawm a ni.

District Bawrhsap chuan tunhnaiah kan District chhung hmun hrang hrangah Covid-19 hri-in min nuai mek chu pawi a tih thu sawiin mitinte kan fimkhur lehzual a tul thu a sawi a. Sawrkarin dan a siamte zawm kawngah tan la lehzual turin District mipuite a ngen bawk.

Meeting-ah hian Chief Medical Office, Mamit-in an record angin tun meka Mamit District chhunga hrivei mek dinhmun ngaihthlak a ni a. Mamit District chhung khaw hrang hrang 44 atangin hrikai mi 1197 leh hmundang atanga District chhunga awm mi 36, an vaiin mi 1233 hrikai an awm mek thu ngaihthlak a ni. Covid-19 vaccine la duhlo khaw thenkhatah an la awm thu ngaihthlak niin hei hi Committee chuan pawi a ti hle a, District chhung mipui Vaccine la thei zawng zawngte chu Vaccine la vek turin Committee chuan a ngen bawk a ni.

SP, Mamit pawhin No Tolerance Week hman mekah Police lam tha taka duty tir an nih thusawiin dan bawhchhiate dan anga pawisa chawitir zel an ni a. Mamit Police te hian Aizawl leh Lunglei tih lohah dan bawhchhe chawitir an ngah ber thu a tarlang bawk.

District chhunga hrileng mekin ziaawm lam a pan theihna turin Positive tamna hmunah te hri a darh zel loh nan Kohhran inkhawm, Kohhran Programme hrang hrang hun engemaw chhung khap rih nise tih a ni a. Kohhran mipuite pawhin hrethiama zawm turin committee hian a ngen a ni.

Meeting hian Covid -19 veite enkawlna hmun 3C leh 4C te chu kaithar lut leh dam tawh chhuak tur chungchangah mumal lehzuala ruahmanna siam nise tih a ni a, 3C leh 4C te hi a theih ang anga an mamawh hrang hrangte phuhrukpui dan ngaihtuah nise a ti bawk.

Meeting-ah hian SP, Mamit, Health Department Officials, Incident Commanders/BDO, Mission Foundation Movement, Piramal Foundation, Mamit khawpui chhunga VLTF Chairman-te bakah Covid-19 dona kawnga thawktu hrang hrangte an tel a ni.