Bible Society of India (BSI) in kum 200 (Bi-Centenary) a tlin lawmna St.Paul’s Cathedral.Kolkata a nimina neih Chief Minister Pu Lal Thanhawla chu session hmasa ah khuallian niin a hmanpui a. Vawiin khan dam takin Aizawl alo thleng leh ta.

 

 

 

 

Chief Minister Pu lal Thanhawla chuan BSI  in kum 200 tlin lawmna hmanpui tura an sawm chu ropui a tih thu a sawi a. Bible Society chu Kohhran ban pakhat pawimawh tak a ni tiin, kristian pawlah chuan India a upa ber leh khawvelah pawh lian ber anih thu a tarlang a.Hnam hrang hrang ten mahni tawng ngei a Bible chhiar theiha lehlin hna an thawk chu ropui a tiin tunah phei chuan India a hnam hrang hrang 49 ten mahni tawnga ziak ngei, Bible an nei thei tawh nghe nghe a ni a ti.

Mizorama Aizawl Auxiliary chu nasa taka a than thu sawiin, Chief Minister chuan thawhlawm thawh thu ah pawh Andhra Pradesh Auxiliary dawttu kan nih thu a tarlang a. Bible Society  hi kohhran hrang hrangte phuarkhawmtu anih avang hian a pawimawh bik hle a ni a ti. Pu Lal Thanhawla chuan ram leh mipui tana kum 40 teh meuh hna alo thawh tawh chhunga Bible in a nun a khawih dan sawiin, Chanchintha Matthaia ziak Bung 11 Chang 28 - 30 ah chawlh hahdamna a hmuh thu a sawi bawk a ni.

Lawmna inkhawmah hian Lord David Alton, House of Lords,U.K., Andrew Reed, M.P., U.K. leh West Bengal Governor M.K.Narayanan, session hnihna a khuallian ten an hmanpui bawk a ni.

Chief Minister hi a nupui Pi Lalriliani leh Pu L.R.Sailo, Press Secretary to Chief Minister ten an tawiawm a ni.