Bible Society of India in Committee sang ber Aizawla neih turah, nizan khan Tourist Lodge Chaltlang-ah Auxiliary 15 atanga Executive Member lo kal te lawmna inkhawm, ‘Chibai Function’ an buatsaih a, Chief Minister Pu Lal Thanhawla chuan a hmanpui.

Chief Minister chuan Mizoram chu India rama hmun kilkhawr bera awm, mite tlawh pawh loh ber state a ni a ti a. Hemi anih avang hian Prime Minister Pi Indira Gandhi atanga tuna kan Prime Minister Dr Manmohan Singh thleng hian Mizorama lo zin tura a sawm thin thu a sawi a. Chutichung pawhin kan ram hruaitute hian an rawn la tlawh lo hle a ni a ti. Hetih laia BSI in a vawi hnihna atana executive meeting nei tura Aizawl an rawn thlang leh chu a lawmawm hle a ni a ti a. Pathian remruatna ni ngeia a hriat thu a sawi a ni. Chief Minister chuan Mizoram chu khawvela sakhaw lian ber ber pathum, Hinduism, Buddhism leh Islam ten min karcheh chungin, Chanchintha hmangin Pathianin min rawn zawng chhuak a, tunah chuan ram pumah ziak leh chhiar thiam tamna ber dawttu state kan ni phak tawh a ni a ti a. A Chanchintha thehdarhna lamah missionary tam tak ram chhungah leh ram pawnah te hial kan tir thei ta te hi Pathian malsawmna a ni a ti a. Meeting-a tel tura lokal zawng zawngte hnenah Chief Minister chuan thlenna nuam leh tha pe theilo mahila, Mizote hawihhawmna hi kan pek theih a ni tiin, an cham chhung tawite ah hlim tak leh tlangnel taka awm turin duhsakna a hlan a ni.

BSI President Dr.(Mrs) Navamani E.Peter chuan Aizawl Auxiliary chu rinawm leh inpezo tak, thawhpui nuam tak a ni a ti.

Bible Society hi Bible lehlin, siam chhuah leh thehdarh hi a hna pui ber a ni a. Khawvel ram 172 ah awmin, United Bible Society in a phuarkhawm a ni.

Lawmna inkhawmah hian Auxiliary President hlui, Rev. K.Lalzuala’n Pathian hnena inhlanna hun a hmang a. Palaite lawmna thuchah Auxiliary President Rev. Vanlalbela’n a nei a. Thusawina President, BSI leh BSI Gen Secretary Rev Dr. M.Mani Chacko ten an nei bawk a; hun kharna tawngtai Most Rev Stephen Rotluanga, Bishop of Aizawl (RC) in a hmang bawk a ni.