1165/2023-2024

Hnahthial the 18th July 2023: State Election Commission, Mizoram thuchhuah angin Hnahthial District a Bualpui V Village Council By-Election neih tur a ni a. Hemi atana inpuahchahna kalzelah vawiin khan District Election Officer, Pu R Lalremsanga, District Bawrhsap ni bawk chuan Bualpui V VC By-election Final Electoral Rolls, 2023 chu DC office-ah a tlangzarh a, a copy chu political party hrang hrang aiawhte leh NGO aiawha kal te a hlan nghal a ni.

District Election Officer Pu R Lalremsanga chuan VC te chu ram inrelbawlna kawnga pawimawh tak leh sawrkar kutke pawimawh tak an nih thu a sawi a. Thawhhona duhawm tak hnuaiah hun bi thliah ang zela felfai taka kalpui a beisei thu a sawi. Inthlanna dik leh muanawm nei turin electoral roll felfai leh thianghlim neih a pawimawh hmasak thu sawiin, electoral roll-a chuang tur dik takte an tel a, tel lo turte thenfai a nih theih nana thuneitute tawiawm tlat turin kalkhawmte a chah a ni.

Vawiina Bualpui V VC By-election Final Electoral Roll tlangzarhin a tarlan danin tun dinhmunah Bualpui V ah hian vote nei mi 384 an awm a; heng zinga 191 hi mipa niin, a dang 193 te chu hmeichhia an ni. VC seat 3 awm in General seat 2 leh Reserved seat 1 an nei a ni.

Draft electoral roll hi June ni 26 2023 khan tlangzarh a ni a. June ni 27, 2023 atanga July ni 11, 2023 thlengin thu thlen duh neite tan ‘claims & objections period’ hawn a ni a, hemi hun chhung hian roll-a inziaklut tura dilna leh thu thlen duh neite tan hun hawn a ni. July ni 17, 2023 thleng khan dilna lut leh siamthat tulte hearing kaltlanga chinfel a ni a. Vawiin khan VC election neih huna hman tur Final Electoral roll chu tlangzarh a ni.

He hunah hian DC bakah, Election Officer, SDO(S) , SDC leh Political party aiawhte, veng chhung NGO hotute leh Chanchinbumite an tel a ni.