1164/2023-2024

Champhai, the 18th July, 2023: Vawiin chawhma dar 9:30 khan District Election Officer, Pu James Lalrinchhana chuan Champhai Zion Veng VC Bye-Election Final Electoral Roll, 2023 chu DC Conference Hall-ah a tlangzarh a, bu hnih theuh political party aiawh leh NGO hotute hnenah a hlan nghal a ni.

District Election Officer Pu James Lalrinchhana chuan hun leh tha senga kalkhawmte lawmna thu sawiin, inthlan nan mai nilo khawtlang dinhmun hriatchian nan leh zirbingna neih tul hun pawha chhawr tangkai theih tur, Champhai Zion Veng VC Electoral Roll thar ber tlangzarh a ni ta chu lawmawm a tih thu a sawi a. Final electoral roll peihfel a nih theih nana theihtawp chhuahtute fakawm a tih thu sawiin, Electoral Roll chu mipuite ta, mipuite tana tlangzarh a nih thu a sawi bawk.

Election Officer Pu Benjamin Zalawma Ralte hnen atangin final roll report tlangpui ngaihthlak a ni a. ERO leh AERO hnen atangin report ngaihthlak a ni bawk.

Vawiina Champhai Zion Veng VC bye-election final electoral roll 2023 tlangzarh takin a tarlan dan chuan tun dinhmunah Zion Vengah vote nei mi 844 an awm a; heng zinga 393 hi mipa niin, a dang 451 te chu hmeichhia an ni a, hmeichhe vote nei hi 58 in an tam zawk a ni. June ni 26, 2023 a draft electoral roll tlangzarhah khan vote nei mi 836 (Mipa 390 leh Hmeichhia 446) an awm a, heta tang hian roll siamthatna hun hawna hearing zawhfel a nih hnuah lut thar mi 20 (Mipa 11 leh Hmeichhia 9) an awm laiin, roll atanga paih mi 12 (Mipa 8 leh Hmeichhia 4) an awm thung a. Draft electoral roll atanga final electoral roll punna hi vote 8 niin a punna hi za zela 0.96 (0.96%) a ni.

Vawiina Champhai Zion Veng VC By-election Final Electoral Roll tlangzarhin a tarlan dan chuan tun dinhmunah Champhai Zion Vengah chenna in 268 awm mekin VC seat 5; General seat 4 leh Reserved seat 1 an nei thei a. VC member 1 Reserved seat atanga tling boral avangin he seat bik hnawhkhat tur hian inthlan buatsaih tur a ni a, BM Primary School chu Polling Station atana ruat a ni.

He hunah hian ERO/AERO, DIPRO, Zion Veng VLO, Political party aiawhte leh veng chhung NGO hotute an tel a ni.