629/2023-2024

Champhai, the 31st May, 2023: World No Tobacco Day 2023 pualin vawiin chawhma dar 9:30 khan National Tobacco Control Programme, National Health Mission, Mizoram hnuaiah State Tobacco Control Cell leh District Tobacco Control Cell buatsaihin Champhai District Buang khuaah vaihlo leh a kaihhnawih laka fihlim tura inzirtirna, 'Eitur hrisel ching rawh, Vaihlo ni lovin' (Grow Food, Not Tobacco) tih thupui hmanga neih a ni a, hemi hnu hian a thlawn veka inentirna leh damdawi semchhuahna Free Clinic buatsaih a ni.

Khuallian ni a he hun hmanpuitu District Bawrhsap Pu James Lalrinchhana chuan khawvel hmun dangte ruala mithiam tak takte nena tangkawpa Buang khuaa vaihlo dona ni, World No Tobacco Day leh hemi kawnga inzirtirna hun buatsaih chuan rah tha a chhuah ngei a beisei thu a sawi a. Vaihlo leh a kaihhnawihin nghawng thalo tak a neih thu tarlangin, vaihlo chin leh zawrh hmanga eizawnnate thlak thei tur eizawnna dang ngaihtuah hova tanlak dan tur dap tlan a tul thu a sawi a; hemi kawnga theihtawp chhuaha tanrual puiah khawtlang mipuite a sawm a. Tun hun mai nilo, nakin hun ngaihtuah chunga eizawnna ngelnghet leh hriselna kawnga him zawn thiam a pawimawh thu a sawi bawk a. Taksa, rilru leh ngaihtuahna hrisel nei chunga hmalak a tul thu sawiin, Champhai District-ah zirna, hriselna leh infiamna kawnga hmasawnnate thil dang ngaihthah chuang lova ngaih pawimawh a ni, a ti a. Vaihlo leh a kaihhnawih laka fihlim rihlote chu bansan ngam tura theihtawp chhuah turin a sawm a. Buang khuaa chengte hriselna tura inzirtirna leh Doctor thiam tak takte kaltlanga Free Clinic buatsaih chuan malsawmna leh hlawkna nasa tak a thlen ngei a beisei thu a sawi bawk.

Thusawitu dang Dr H.Lianthangpuia, State Nodal Officer, National Tobacco Control Programme, National Health Mission, Mizoram chuan khawvel huapa World No Tobacco Day hman a nih thu sawiin, Champhai District Buang khuaah State Tobacco Control Cell leh District Tobacco Control Cell tangkawpin programme a buatsaih chu Aizawl pawna State huapa World No Tobacco Day hman hmasak berna a ni, a ti a. Kumin a thupui thlan mil tur anga programme duan a nih thu pawh sawiin, hemi atana hmalakna tur hian Buang khua chu thlan a nih thu a sawi bawk.

Kumin World No Tobacco Day thupui 'Eitur hrisel ching rawh, Vaihlo ni lovin' (Grow Food; Not Tobacco) tih leh vaihlo leh a kaihhnawihin hriselna a nghawng dan Pu R.Lalremruata, State Consultant, National Tobacco Control Programme (NTCP) in powerpoint presentation kaltlangin a sawifiah a. Ei leh in leh thlai chinah duhthlan tur a awm nual rualin hriselna atana nghawng thalo thlente erawh bansan a that thu sawiin, khawvel pumah kum tin vaihlo leh a kaihhnawih avangin mi maktaduai 8 chuang an boral thu a sawi a. Mizoram mipui kum 13-15 inkar zingah zuk leh hmuam ti za zela 58 an awm thu leh kum 15 chunglam zinga za zela 58.7 an awm tlin thu sawiin, sim tum za zela 20 te'n an sim theih thu a sawi a. Thla khat chhungin meizial lei nan cheng nuai 918.94 vel sengral zel anga chhut a nih thu a sawi bawk a. Vaihlo leh a kaihhnawihte chu ruihhlo dang tihna tura kailawn langsar tak a nih avangin naupangteah zuk leh hmuam ti lo tura zirtirna nasa zawka kalpui a tul takzet thu a sawi bawk a. Vaihloin taksaa nghawng thalo a thlen hrang hrangte a lem nena entirin zirtirna a pe a, vaihlo leh a kaihhnawih khuahkhirhna dan 'Cigarettes and Other Tobacco Products Act, 2003 (COTPA, 2003)' chungchang a sawifiah nghal bawk.

He hun Govt. Buang Middle School a buatsaih hi Buang VC Vice President Pu LC Lalzuimawia'n kaihruaiin, VCP Pu Khawtinliana'n kalkhawmte lawmna leh inhmelhriattirna hun a hmang a. Dr. Katy Zomawii Vaiphei, Medical Officer, AYUSH, District Hospital Champhaiin AYUSH chungchang a sawifiah a. Dr. PC Lalhmingliana, Chief Medical Officer, Champhai District-in lawmthu sawia inzirtirna hun a khar hnuah Free Clinc neih chhunzawm a ni.

World No Tobacco Day 2023 pual Free Clinic Buang khuaa buatsaih kaltlang hian a thlawna inentirna hun hawn niin, damdawite sem chhuah a ni bawk a. He hunah hian thiamna hrang hrang nei Doctor 12 leh Staff 20 chuang zet an tel thei a, Free Clinc kaltlang hian mi 180 an inentir a ni.