Mizoram sawrkarin kum 2011 “Buh thar tam kum” atana a puan bawhzui tha ber “Best Performing District” Award Serchhip District a hlan chu nimin khan F.I.S.C Hall, Agriculture Complex, Serchhip-ah Serchhip District Agriculture Office huaihawtin lawm a ni a, District Bawrhsap Pu P.Lalchhuanga’n khuallian niin a hmanpui a, District chhunga Sawrkar pisa hrang hrang hotute bakah District chhung khaw hrang hrang a loneitute an tel tha hle a, a lawm nan hian Bawng talh niin tlaiah ruai ropui tak kilho a ni.

Award lawmna inkhawm hmanpuitu District Bawrhsap Pu P.Lalchhuanga chuan Serchhip District-in hetiang Award a dawng chu lawmawm a tih thu sawiin Sawrkarin ruahmanna tha tak a siam dik tak leh rinawm taka kalpuitu Serchhip District Agriculture Officer leh a thawhpuite bakah thuawihna leh taimakna nena hma la tu loneitute thawhrimna leh thawhhona tha in a rah chhuah a ni a ti a, hmasawnna leh hlawhtlinna hian tawp chin a nei lo a ni tiin, tuna an hlawhtlinna hi duhtawk mai lova District dangte tihhmuhtu leh hmahruaitu ni tura tan lak belhchhah sauh sauh turin loneitute leh Sawrkar hnathawkte a chah a, Agriculture Department a thawkte taimakna leh inpekna fakin NLUP hmalaknaah pawh Serchhip District chhunga fak hlawh ber an nih thu a sawi bawk.

Kum 2011 January ni 25 khan Mizoram Chief Minister Pu Lal Thanhawla chuan Electric Veng YMA Hall-ah “Buhfai Thar Tam Kum 2011” a puang a, hemi bawhzui hian Serchhip DAO chuan hma la nghalin WRC-I Bungtlangah Hectare 4.50, Thenzawl Thliarpui zau ah Hectare 4.50 leh Chhingchhip Mualkhang Zau ah WRC-II Hectare 8.50 te a siam belh nghal a, buh chin dan thar SRI leh Improved Packages atan Hectare 400 leh Hectare 500 ve ve ah hma lak niin Improved Jhum atan hectare 120.40 a zau ah hma lak a ni bawk, Department a thawktuten loneitute hi an lo-ah kalchilhin Farmer Field School hnuaiah Training an neihpui thin a, loneitute lo zau zawng te tehin SRI chin na hmunte a hmunah ngei an enfiah pui a, hetianga thawhhona tha a awm avang hian Serchhip District chhung a buh thar pawh 14% laia pungin Mizoram pumah “Best Performing District Award” an dawng thei a ni.

Nimina Award lawmna inkhawm hi Pu Lalthansiama, DAO Serchhip District in a kaihruaia, Pu Zokhuma Varte, SDAO Serchhip-in Technical Report a pe a, Khualzahawm Pu Lalrinliana, Jt. Director(CH) Agriculture Department bakah loneitu engemawzatin lawmthu sawiin hun an hmang a ni.

Nimin inkhawmah hian FMC, Chhiahtlang leh NWPRA, Zairem Project ten Serchhip DAO hnenah hian hnathawh that lawman lawmpuina thuziak an hlan a, DAO chuan loneitute hi lawmman dawngtu diktak zawk an nih thu leh amah leh office a a thawhpuite chu loneitute tanpuitu mai an nih thu a sawi a ni.

He inkhawmah hian Serchhip DAO hnuaia NWPRA leh WDPSCA Project bawhzui thate hnenah lawmman sem a ni a, lawmman hi District Bawrhsap Pu P.Lalchhuanga’n a sem a ni. Lawmman dawngtute chu :

NWPRA titha zualte :

1)      Sakei Lui NWPRA, Chhingchhip 

2)      Tuikum Lui NWPRA, Serchhip

3)      Tuichang NWPRA, Tuichang&Hmunzawl

WDPSCA titha zualte :

1)      Lungsi Lui WDPSCA, Keitum

2)      Upper Lungva WDPSCA, Mualcheng

3)      Maudarh Lui WDPSCA, Chhingchhip te an ni.