Transport Minister Pu P.C. Zoram Sangliana chuan nimin tlai khan Kolasib atanga 25 Kms. a hla Buhchang khua ah Vur siamna khawl Ice Plant a hawng.

Hawnna inkhawm Buhchang Community Hall-a neihah thu sawiin Pu P.C. Zoram Sangliana chuan Sangha Dil tam tak awmna hmuna sangha khawia eizawngtu ten a tul anga an chhawr theih tura Ice Plant tha tak bun a ni chu lawmawm a tih thu a sawi a. He sawrkar hian kut hnathawktuten an thawh rah an seng tur a ni tih hi a ngaihdan a ni a. Chumi ti hlawhtling tura Ice Plant bun a ni ta hi a ropui ka tiin, Buhchang khawtlangin a hnena an lo thlen, Plant lian leh changtlung zawk bun tura tan lakpui tura an ngenna chu lo bawhzui sak a, a theih ang apiang tih a inhuam thu a sawi a ni.

Pu Ramsanga chuan, Mizote hian kan ram kan humhalh tur a ni, a ti a. Kan ram/leilet leh phai a ni emaw, inches khat pawh kan hloh tur a ni lo, a ti a. Khawvel ram dangte chu kan ram aiin a nuam zawk a ni thei, amaherawh chu mahni ram tluka hlu hi a awm lo tih kan hriat a tul a, kan ram hi mikhual kutah kan dah thianglo a ni, a ti a ni. NLUP avangin mi taktakin eizawnna nghet an nei ta hi a lawmawm a. Sawrkar chuan a marketing thlengin a ngaihtuah a, Mipui tena min tehna fo tura ka duh chu politician te hian kan tih tur kan hlen em, kan thutiamah kan ding em tih hi a ni, a ti a. Pathian hriatna nen ram tan chak takin ke i pen zel ang u, a ti a ni.

Buhchang-a Ice Plant hi Zofisfed leh Fisheries Department tena an thawh dun a ni a. Fisheries Post Harvest Insfrastructure Scheme (CSS) atanga tangka 12.52 lakh senga din a ni.Ice Plant ah hian Vur 13 Kgs a rit Block zelin a siam a ni.

Pu Thangchungnunga, Chairman, Zofishfed chuan inkhawm hi a kaihruai a ni.