Chief Minister Pu Lal Thanhawla chuan vawiin khan Aizawl Press Club-ah lehkhabu ‘Mizo Tawng Chhuina’ tih C.Chhuanvawra ziak chu a tlangzarh.

Chief Minister chuan he lehkhabu Mizo Tawng Chhuina hian Mizote literature a ti hausa mai a nilova, hnam rohlu tak leh chhuan lokal leh zel turte tana tangkai tak tur a ni a ti a. Mizo tawng hi a mawiin a hausa a; literature lamah mi tuimi ten an ti hausa chho zel a, a lawmawm hle a ni a ti a. Hetih laiin a hmanna lamah kan ti rethei lutuk a, pulpit atang leh mithiam zahawm tak tak ten dik tawk lova hmangin an ziak thin bawk a, hei hian Mizo tawng hi a ti dal nasa hle a ni a ti a. Chuvangin Mizo tawng hi dik tak leh uluk taka kan hman a ngai a, hemi lam tichak tur hian kan mithiamte hian seminarte buatsaiha sawihona te nei thin se a duhthu a sawi a ni.

Lehkahbu hi Rev. Chuauthuama’n thlirlawkna neiin, phek 278 a awm thu a sawi a. A ziaktu hi Mizo tawng na na ah chuan ‘authority’ tling nia a hriat thu sawiin, a lehkhabu hi belh tlak leh chhawr naawm tak a ni ngei ang a ti. A ziaktu C.Chhuanvawra chuan lehkhabu a ziah tawh 12 zingah ala chhuan ber (masterpiece) anih thu a sawi bawk. C.Chhuanvawra hi Mizo Academy of Letters a Vice President ni lai a ni.

Lehkhabu tlangzarh inkhawm hi T.Sangkunga, President, CYMA in a kaihruai a ni.